3611/2024-2025

Dated Aizawl, the 2nd December 2024: Vawiin khan Mizoram Agricultural Marketing Board (MAMB) te chu Chief Minister Pu Lalduhoma kaihhruaiin CM Conference Hall-ah an thukhawm a, Hmuhphiah leitu turte nena inremna ziah dan tur an duang.

Meeting hian Hmunphiah lei thei turte zawnna (expression of interest) a lo neih tawhna atanga sawrkar rate bituk zata lei thei tur firm te nen season khat chhung inremna siam an remti a. Buyers ten an lei theih bak zawng chu sawrkarin lei mai se, tiin thutlukna an siam.

Buyers ten sawrkar warehouse an hman theih dan tur ruahmanna pawh duan a ni a, warehouse hman theih te hi a tul zual chei mek a ni. A hmang duh empanelled buyers ten a hming chauha luahman pein an hmang thei ang. District level (DAMC) atanga secondary collection centre atana hman theih list an rawn thehluh pawh an pawm bawk.

Tarlan tawh thin angin sawrkarin thlai thar a lei tur te hi support price pek ngai lo va kalpui theih (support price aia sanga hralh theihna) ah chuan zalen taka lei leh hralh theih (open market) reng a ni a. Support price hnuaia luhpui a tul hunah sawrkar ruahmanna anga kalpui tur a ni thung. Hmunphiah hi a hring chu support price pek a ni dawn lo va, a ro chauh support price siam a ni. Sawhthing leh Aieng hi sawrkarin support price a pek theih hun chhung chu January - May inkar a ni a, Hmarcha leh Hmunphiahah January - March a ni. Support Price pek ngai lo chu zalen taka lei leh hralh kalpui theih reng niin support price pek ngai te rawh chu secondary collection centre-ah zel pek tur a ni. Tunah hian district tinah District Agricultural Marketing Committee (DAMC) hmalakna in heng Secondary Collection centre/Auction centre hi siam fel mek a ni.

Sawrkar in Support price a pekna tur chu heng Secondary Collection centre ah zel hian a ni anga, khaw hrang hrang ten sawrkar rate siam aia tlawm a an khuaa an hralh duh pawhin phal vek a nia, mahse support price chu heng Sawrkar in a ruat collection centre ah zel tur a ni a, a phurh thlenna transport cost chu sawrkar a sawi tel lo a, society ten a tul angin an lo buaipui ang.

December ni 6 khian Baptist Centre, Falkland-ah MAMB leh Agricultural and Processed Food Products Export Development Authority (APEDA) tangkawp chuan buyers-sellers meet an buatsaih dawn a. Foreign atangin Company 13 leh India ram chhung atangin Company 22 ten an rawn tel tur thu an tichiang tawh a ni. Hemi inbuatsaihna pawh hi an sawi a, tih tur tul la awm te bawhzui dan tur an duang.

Meeting-ah hian Pu PC Vanlalruata, Agriculture Minister,  Pu B. Lalchhanzova, Supply Minister, Pu F. Rodingliana, Industry Minister, Dr. KC Lalmalsawmzauva, Adviser to CM leh MAMB members te an tel a ni.