3612/2024-2025

Dated Aizawl, 2nd December 2024 : Vawiin chhun dar 12 khan Dr. Vanlalthlana, Minister, Information & Public Relations Department chuan Sikkim Press Tour - a kalte a Office Chamber- ah thingpui inpuiin, inkawmhona neihpui.

Dr. Vanlalthlana chuan Press Tour hlawhtling tak nei a, dam taka  Mizoram an lo let leh chu lawmawm a tih thu a sawi a. Mizoram pawhin 'Tourist' tam zawk hîp turin hmunhma leh tlawhtur tha tak tak a nei tih tarlangin, inzawrh (marketing)  lamah tan lak a tul hle a ni, a ti a. Mahni inpho lâr a, tourist hîp thei turin MJA Memeber- te chu an thuziak kawngah theihtawpa au chhuak turin a sawm a. Mizoram hmun mawi leh tlawh tlak ang angte chei that kawngah pawh tun aia tan lak a tul a, mipuite pawh tourist dawng thiam turin hawih hawm kawngah nasa zawka  ngaihtuahna seng thiam a tul hle a ti.

Minister chuan 'Press Tour'  neih a lo ni fo  tawh thin a, rualawhna nen kan lo let thin a, rilrua ngaihtuahna kan neih leh Mizoramah pawh tih ve theih ni a kan hriatte tihlawhtling turin department hrang hrangte beng thleng phak tura hmalak thiam pawh a tul hle a ti. Dr. Vanlalthlana chuan Press tour hlawhtling taka neih a nih zel theih nan,  rawtna fel fai tak siam a, tour neih leh dawna en let theih tura ruahmanna siam thin  turin Official- te a chah a ni.

Vawiin hun hmannaah hian 'Press Tour' a kalte atangin Sikkim an tlawh report tawi pekna an nei a. An rual awhna leh Mizorama  tih ve tura thate  leh ram tana tangkai tura an hriatte chu Minister hnenah hian an thlen a. Minister chuan theihtawp  chhuahpui a inhuam thu sawiin, a tul anga hmalak a nih theih nan MJA-  te chu a kaihhnawih  department- te pawh sawipui turin a ngen nghal bawk.

Sikkim Press Tour-  kalte puala thingpui inhonaah hian Pi Betsy Zothanpari Sailo, Secretary, I&PR, Pu V. Ruatsanga, Addl. Secretary, I&PR, Pu C. Lalnunkima, Director, I&PR, Pi K. Vanlalsangi, Jt. Director, I&PR, leh President , MJA, bakah Sikkim  Press Tour -a kalte an tel thei a ni.