3613/2024-2025

Saitual, the 2nd December, 2024: Vawiin khan Mizoram Pollution Control Board, Aizawl leh School Education Department, Saitual tangkawp buatsaih kawngpui dung tihfai kawngzawh “Mass Plogger Fun Run for Mizoram School Eco-Club” chu National Pollution Control Day, 2024 pualin Saitualah neih a ni a, he hun hi District Bawrhsap Dr. Lalngura Tlau chuan a hmanpui.  

District Bawrhsap Dr. Lalngura Tlau chuan thu sawiin thil ropui tak te pawh a bul tanna chu te tak te a nih thin avangin vawiina zirlai naupangte hmalakna pawh hi Saitual leh Keifang khaw chhung tihfai nana bul tantu pawimawh tak a ni, a ti. Bawrhsap chuan faina hi ni khat awh tur atan chauh ni loin damchhunga nunpui tur a ni tih a sawi a, midangte pawh faina chungchang hrilh hre zel turin kalkhawmte chu a chah a. Dr. Lalngura Tlau chuan zirlaite chu mahni in leh a vel tihfai kawnga tan la turin a fuih a, kawngpui dunga bawlhhlawh tlate char zel turin leh khaw fai ber ni tura hma la zel turin a ngen a ni.  

District Education Officer leh District Project Co-ordinator ni bawk, Pu Micky R. Lalenkawla pawhin thu sawiin Mizoram School Eco-club hma laknaa hun an hmang thei chu lawmawm a tih thu a sawi a, faina chu mahni inchhung atanga intan a ni, a ti. DEO chuan Saitualah movement thar “Clean and Green Saitual” din tum a nih thu sawiin, he movement hmang hian Saitual tihfai piah lamah mawi taka pangpar leh thingkung hmanga chei tum a ni tih a sawi a, zirlai naupangte atang bul tan tum a ni, a ti. Pu Micky R. Lalenkawla chuan zirlai naupang kalkhawmte chu khawpui fai inelna hun chhung chauha fai lo a, faina nunpui chhunzawm zel turin a fuih a ni.    

He kawngpui dung tihfai kawngzawhah hian Saitual leh Keifang chhunga high school pasarih an tel a, zirlai naupangte leh zirtirtute chu insemdarhin kawng dung leh kawng sir kawra bawlhlawh te an chhar fai a. Hemi zawh hian CI kawnah zirlaite leh zirtirtute chu intawkkhawmin hun hman a ni a, he hun hi Pu Micky R. Lalenkawla chuan kaihruaiin, Distict Bawrhsap Dr. Lalngura Tlau chuan thu a sawi a ni.