3590/2024-2025

Aizawl, the 18th December, 2024: Vawiin chawhma dar 10 khan Mizoram Governor Dr. Hari Babu Kambhampati chuan Indian Council of Agricultural Research - Indian Institute of Oil Palm Research (ICAR-IIOPR), Pedavegi, West Godavari, Andra Pradesh atanga lokal Dr. K. Manorama, Principal Scientist, Dr. G. Ravichandran, Principal Scientist leh Dr. G. Somasundaran, Senior Scientist-te chu Raj Bhavan-ah kawmin Mizoramin Oil palm tam zawk a thar chhuah theih nana pawimawhte a sawipui a; farmar-te'n harstana an tawh hrang hrangte leh a chinfel dan turte a sawipui bawk. 

Governor Dr. Hari Babu Kambhampati chuan Agriculture ram ni chungin India chu hriak ei chi (edible oil) ah a intodelh loh thu leh a mamawh tam zawk ram dang atanga a lakluh thu sawiin, hemi harstana chingfel tur hian Sawrkarin theihtawp a chhuah mek a ni, a ti a. Oil palm thar chhuah kawnga theihna nasa tak nei Mizoramah theihtawp chhuaha hmalak a tul thu sawiin, hemi kawnga thiamna nei ICAR-IIOPR hotute chu oil palm chingtute harsatna leh mamawhte ngun zawka ngaihvenpui tur leh, ICAR Research Complex for NEH Region, Mizoram Centre, Kolasib kaltlanga chak zawka hmalak a nih theih nana tan la turin a chah a. Mizoram chu India rama oil palm thar chhuah tamna ber ni thei tura tanlakpui turin a chah nghal bawk.

He hunah hian ICAR- Indian Institute of Oil Palm Research hotute'n Mizorama hma an lak tawh dante Governor hi an hrilh a. Mizoram chu NE State zinga oil palm chin tamna ber a nih mek thu leh potential area 60,000-70,000 hectare a zau a neih thu an sawi a ni.