3589/2024-2025

Dated Aizawl, the 18th December 2024: Vawiin khan CM Conference Hall-ah Chief Minister Pu Lalduhoma hmaah Bana Kaih Scheme hnuaia Progress Partners te loan pekna atan Mizoram Sorkar leh Partner Banks State Bank of India (SBI), Mizoram Rural Bank (MRB) Ieh Mizoram Co-operative Apex Bank Ltd. (MCAB) te chuan inremna (Memorandum of Agreement) an ziak a. Chief Minister hian Chief Minister's Bana Kaih Innovation Challenge an hawng bawk.

Pu Lalduhoma chuan, "Bana Kaih Scheme chu a takin kan lo kalpui dawn ta a. Bank te nena thawh dun ngai a nih angin kan thawhpui tur bank te nena inremna kan ziak thei ta hi kan hlim hle. Mizoram tana ni chhinchhiahtlak, hmasawnna kawng dik min zawhtirtu hmalakna a nih ngei kan beisei a ni," a ti.

Pu Lalmalsawma Pachuau, Secretary, Planning & Programme Implementation in a kaihhruai inremna ziak inkhawmah hian Pu Vanlaldina Fanai, Commissioner & Secretary to the government of Mizoram chuan kal khawmte lawmna thu a sawi a. Chumi zawhah inremna hi ziah a ni.

Inremna hi Mizoram Sorkar aiawhin Pu Lalmalsawma Pachuau, Secretary to the Government of Mizoram, Planning & Programme Implementation Department in a ziak a, Dr. Lalrinchhana, Principal Adviser-cum-Additional Secretary, Planning & Programme Implementation Department chu hriatpuitu a ni.

SBI aiawhin Pu Hubert S.Z Khobung, Regional Manager, Regional Business Office, Aizawl chuan a ziak a, Pu Neeraj Kapoor, Deputy General Manager, Local Head Office, Guwahati chu hriatpuitu a ni.

MRB aiawhin Pi Sheryl L Vanchhong, Chairman, MRB chuan a ziak a, Pu Naveen Thapa, Chief Manager, Loans & NPA chu hriatpuitu a ni.

MCAB aiawhin Pu A. Lallungmuana, Chief Executive Officer chuan a ziak a, Pu H.Lalramdina, Assistant General Manager chu hriatpuitu a ni. 

Inremna ziah zawhah Chief Minister Pu Lalduhoma chuan Chief Minister's Bana Kaih Innovation Challenge a hawng leh bawk.

Chief Minister Bana Kaih Innovation Challenge hnuaiah hian intihsiakna hrang hrang a awm dawn a, chungte chu: 

1. Department Innovation Challenge: Sawrkar department hrang hrangten project pakhat theuh rawn theh chhuakin intihsiakna neih tur a ni. 

2. District Innovation Challenge: Mizoram district zawng zawngten DC kaihhruaina hnuaia neih tur a ni a. Tah hian NGOs, LC/VC, Self-Help Group (SHGs), Primary Agricultural Credit Societies PACS) te leh Society anga in register zawng zawngte an tel thei dawn a ni. 

3. Higher Educational Institutes' Local Immersion Challenge: Mizoram sawkar hnuaia college-te, Central sawrkar nuaia college-te leh private college-te he challenge-ah hian an tel thei a ni. Khaw hrang hrangah zirlaite kalin an riak anga, an khaw kalnate'n harsatna an tawhte zirchiangin, chhawk zangkhai theih dan an ngaihtuahsak ang.

4. Inventor's Challenge: Ngaihtuahna thar seng a, thil tha leh tangkai duang chhuak turte tan he intihsiakna hi buatsaih a ni. Thil thar/tih dan thar (innovation) a ni tur a ni a, Mizoram tana danglamna thlen duhte tan a tel theih vek a ni. Heng intihsiaknaah hian a titha zual bikte thlang chhuakin, lawmman siamsak an ni ang. 

Intihsiakna kalpui dan tur kimchang hi Planning & Programme Implementation Department chuan an la tichhuak leh dawn a ni.