Mizoram Governor Lt. Gen (Rtd) M.M Lakhera, PVSM,AVSM,VSM chuan vawiin khan IGNOU Regional Centre, Aizawl buatsaih Joint Induction Programme Cum  Workshop on Developing Study Skills of Distance Learners, Vanapa Hall a neih chu a hmanpui.

Governor chuan Mizoram ah ziak leh chhiar thiamna hi sang mahse zir sang leh zualna ah  hian duhthu ala sam lova, Mizoram University hi a la naupang a, hetah hian IGNOU (Indira Gandhi National Open University) hi zirlai te tan a pawimawh a ni a ti. Zirlaite hian an course lak ah an chian a ngai a, an zir zawh hunah mahni ke a ding thei khawpa zir turin zirlaite chu Governor chuan chahin zirna in a tum ber chu mahni ke a din leh engpawh lo thleng se hmachhawn thei tura inbuatsaih a ni a ti. Tunah hian sawrkar hna te a vang tawh a chuvangin zirlaite hian tun atang hian mahni a eizawnna tur ngaihtuahna rilru seng turin Governor chuan a chah. Mizo te hi 'classless society' kan nih angin kan thangthar te hi eng hna pawh thawk hreh lo tura inzirtir tha a tih thu Governor chuan a sawi bawk.

Governor hian zirlai kum upa tawh chawimawina hun a  hmang nghal, chawimawina pek te chu 1.Pu B.Rallianzuala, kum 68, BPP (Bachelor Prepartory Programme) 2.Pu Jag Narayan Singh, kum 59, M.A,English, 3.Pu Lalnghinglova Sailo, kum 60, Certificate in Poultry Farming te an ni.

Vawiin inkhawm lo hmang tur hian New Delhi atangin Dr.Pankaj Khare, Registrar, SRD, IGNOU leh Dr.A.Varadarajan, Dy Director, EDNERU, IGNOU te an lo kal a. Regional Centre, Aizawl hnuaiah hian Mizoram pumah Study Centre 38 a awm a, kumin July Session atan khan zirlai 2495 an in register a; BPP 394, BA 1161, MA 568, Certificate 257, Diploma 100 leh PG Certificate/Diploma 15.