Mizoram Governor Lt.Gen (Rtd) Nirbhay Sharma leh a nupui Pi Jyotsna Sharma chuan vawiin tlai khan an chenna Raj Bhavan-ah Mizoram Kohhran hruaitute leh tlawmngai pawl hrang hrang hruaitute an kawm.

Governor chuan Mizorama Krismas kan hman dan chungchang sawiin halpuah leh halmawi lam thilte hal lova kawtthler leh kawn cheimawia Krismas leh Kumthar hun kan hmang thin chu lawmawm a tih thu a sawi a. Heng halmawi chi hrang hrangte hian boruak a tih bawlhhlawh bakah bengchheng a siam a, a hrisel lo hle a ni tiin sawrkar thupek zawma mipuiin thuawih taka halmawi leh halpuah lam thil an hal tlem ta chu a lawmawm hle a ni, a ti. Aizawl khawpui tawt tawh lutuk chu a vei thu sawiin Governor chuan kohhran hruaitute leh tlawmngai pawl hruaituten he harsatna sukiang tur hian an ngaihtuahnate seng turin a sawm bawk.

Kohhran leh tlawmngai pawl hrang hrang awmsa te bakah facebook leh whatsapp group te, thianho intelkhawmten Krismas leh Kumthar vuakveta mi harsa, damlo tanpui ngaite an tanpui thin tih a hriatin Governor chu a lawm hle a. Mizo khawtlang nunah pawn lam mite hriat lar ve loh thil tha leh entawntlak tak tak ka hmu a ni, Governor chuan a ti.

He inkawmkhawmnaah hian Presbyterian kohhran, Baptist kohhran leh Salvation Army hruaitute bakah tlawmngai pawl atangin Central YMA, MHIP leh MUP aiawhte an tel a. Gilead Special School atangin an Chairman leh General Secretary te an tel bawk.