Central Institute of Hindi, Agra bultumin Mizoram Hindi Training College, Aizawl-a Trainees 190 tana ni 18 chhung neih ‘Language Enrichment Course’ chu vawiin khan Mizoram Larsap Lt.Gen.Nirbhay Sharma-in a kharna hun a hmanpui.

Training kharna inkhawm H&TE Director Pu R.Lalrosanga kaihhruaiah Khuallian Lt Gen Nirbhay Sharma chuan India rama hnam tam tak, ziarang leh tawng hrang hrang neite inkarah inunauna leh inpumkhatna a awm theih nan tawng hman tawm leh hriatthiam tlan theih neih a pawimawh a, chumi atan chuan Hindi hi uar a tul a ni, a ti. Mizoram chu kawng hrang hrangah state dangten an tluk lohna leh entawnna tur tam hle mahse Mizoten mahni tawng bak an thiam tam lo hi hmasawnna tithuanawptu lian tak a ni a, chuvangin Hindi leh English hi zirna inah chauh ni lovin khawtlang leh mimal ang pawhin uar deuh deuh a tul a ni, a ti bawk. Hindi zir leh tawng hi Mizote hnam tihrem tumna emaw Mizo tawng leh hnam zerang tihniamna emaw a ni lova, tawng kan thiam tam chuan khawvel zau zawkah hriat kan hlawh ang a, kan thlen chin pawh a sang lehzual thei ang tiin kalkhawmte a fuih. Hindi College zilrai leh zirtirtute chu chanchinbuah article te chhuah a, TV leh radio-ah te pawh programme chi hrang hrang nei turin a chah a; hei hian Hindi tawng chu Mizo zingah a tihlar phah a beisei thu a sawi. English leh Hindi chu khawvela tawng lar ber 3-na leh 4-na an ni tih sawiin Pu Nirbhay Sharma chuan Mizo thalaiten heng tawng pahnihte an thiam phawt chuan khawvel an dengchhuak thei ngei ang, a ti bawk.

Central Institute of Hindi, Agra Course Coordinator Pu Rajveer Singh pawhin thusawiin an hnuaiah branch 8 zinga 3 chu hmarchhak bial - Guwahati, Shillong leh Dimapur - ah a awm, a ti a. Tun tuma an Course buatsaihah chuan Hindi tawng second language leh foreign language anga zirtir dan tur training an rawn pek thu a sawi bawk. CIH Agra bultumin Hindi-Mizo Dictionary pawh buatsaih mek a nih thu a tarlang.

MHTC Principal Dr.H.Dengkimi chuan CIH Agra-a Hindi zir tura kal trainees te chu sorkarin TA/DA a tumsak thin chu pek chhunzawm leh tura a duh thu leh classroom an indaih tawh loh avanga College building zauh/sakzawm a tul thu Governor hnenah a thlen a. Mizoram Larsap chuan an building thawmthatna tur sorkar laipuia HRD Minister hnenah a thlen tawh thu leh a bawhzui zel tur thuin a chhang.

Mizoram Hindi Training College, Aizawl hi kum 1975 atanga din tawh niin tun dinhmunah hian classroom 5 awmin zirtirtu (attached lecturer tiamin) 11 an awm mek a. ‘Language Enrichment Course’ zir College trainees 190-te zinga titha berte hnenah Khuallian hian lawmman a hlan nghal a ni.