2708/2024-2025

Aizawl, the 26th October, 2024: Mizoram Chakma Students' Union, Zonal Hqrs. Aizawl buatsaih zirlai tharte lawmluhna leh Awareness Campaign, Vanapa Hall-a neih chu Mizoram Governor Dr. Hari Babu Kambhampati chuan khuallian niin vawiin chawhma khan a hmanpui. He hunah hian Pu Kalendra Tongchangya, Assistant Adult Education Officer, Chakma Autonomous District Council (CADC) chu khualzahawm a ni. 

Khuallian Dr. Hari Babu Kambhampati chuan Chakma Autonomous District Council Executive Committee tum 11-na, October ni 4, 2024 a neihin primary atanga a chunglamahte Mizo subject zirna kalpui tura thutlukna pawimawh tak a siam thu sawiin, "Hei hian zirlaite tawng chihnih bel taka thiam kawngah a pui thei dawn a, Mizo tawng thiamna chuan Mizote nena inbiakpawh leh inhriatthiam kawngah thui takin a pui theih dawn bakah zirna leh hnathawhna hmun thlengin a pui thei dawn a ni," a ti a. Governor chuan zirna chawisan kawngah Mizo zirlai pawl dangte nen lungrual leh inzahtawn taka hmalak tlan a pawimawh thu sawiin, "Tualchhung amite tihdan leh hnam ziarangte zira inherrem pah chung leh an kalphung, khawtlang nun leh rinnate zah tak chungzelin inkawmhona leh thil tihhonaahte in hnam ziarang leh tihdan phungte pholanga chawinun zel tum ang che u" tiin Chakma zirlai kalkhawmte a chah bawk a ni. 

Mizoram Governor chuan zirlai dangte nena tan ho a awlsam zawk nan chakma zirlaite chu school leh college-a infiamna, zirna leh hmalakna hrang hrangahte tel tama hnam dangte nena inthianthatna nghet siam ngaipawimawh turin a chah a. Zirna chuan zir laia tihthat ngawt nilo, mihring puitlinga siam lam thlenga a huam tel thu sawiin, zirna chuan  indaidannate tizimin khawtlangah inpumkhatna a siam thei a ni, a ti a. Zirlai kalkhawmte chu zirlai mai nilo, hnam ziarang chawilartu leh  khawtlang nun siam thatu an nih tel thu pawh sawiin, rinawmna nen mawhphurhnate hlenchhuah zel tum turin a fuih a. India ram hmun dangte ruala Mizoramin hmasawnna kawng a zawh chhoh ve mek zelah Mizoramin hmabak eng tak a neih theih nan a chhunga cheng zirlai hrang hrangte'n chanvo pawimawh tak hlen chhuah tur an neih thu a sawi bawk. 

Khualzahawm Pu Kalendra Tongchangya, Asst. Adult Education Officer, CADC chuan zirna leh hmasawnna rahbi hrang hrangah tanlak a tul thu sawiin, zirlaite chu theihtawp chhuaha lehkha zir tur leh hlawhtling ngei tura tan la turin a fuih a. Ram leh hnam tana nakin lawka innghahna tur an nih avangin theihna an neihte ringhlel lova taima taka hmalam pan zel tum turin a fuih a ni.  

He hunah hian MCSU Aizawl Zone Gen. Secretary Ripan Chakma chuan kalkhawmte lawmna thu sawiin report a pe a. Aizawl Zone President B. Pattam Chakma, CMCSU Gen. Hqrs. President Parbesh Chakma leh sawm bikte'n thu an sawi a. Inzirtirna leh infuihtharna hun hman niin, zai leh hnam lam hmuhnawm tak takte ngaihthlaka thlir ho a ni.

Full Speech of Governor Dr Hari Babu Kambhampati : DIRECTORATE OF INFORMATION & PUBLIC RELATIONS, Government of Mizoram, India