Vawiin chawhnu dar 4 khan Raj Bhavan  Durbar hall-ah  Prof. Jagdish  Mukhi, Mizoram Governor chuan Mizoram State Lokayukta Chaiman hmasaber ni turin Pu C. Lalsawta, IAS(Rtd) chu rinawmna thu tiam tirin a la lut. 

Eiruk dona kawnga mawhphurhna leh dinhmun pawimawh tak, Lokayukta Chairman lakluhna inkhawm hi  Pu Lalnunmawia Chuaungo, Chief Secretary chuan a kaihruai a. He hun pawimawh takah hian Chief Minister Pu Zoramthanga, Speaker Pu Lalrinliana Sailo, Cabinet Minister te, Minister te, MLA te, Secretary  te leh sawmbik te an tel a ni.

Kum 63 a upa, Pu C.Lalsawta hi Pu Ngama leh Pi Laithangpuii te fa niin Reiek khua-a piang leh seilian a ni a. Primary leh Midddle School chu Reiek-ah a zirchhuak a. High School erawhchu inhlawhfa, hnathawk leh mi in-a awm chungtein Aizawl, Reiek leh Cherrapunjee-ah te a zir a. St. Edmund’s College-ah PU leh St. Anthony’s College-ah BA (Hons) chu hnathawk chungin a zirchhuak a ni.

Pu C. Lalsawta hian hun rei tak chhung sawrkar hna thawk tawhin tawnhriat a ngah bakah a hnathawh chhung hian hmingchhiatna a nei lo a ni. India ram chhunga Training Institution tha ber berahte a zir tawh  a. Syracuse University, USA-ah Advanced Studies in Public Administration a zirchhuak a. UNO in a din, Institute of Public Enterprises, Ljubljana, Slovenia-ah leh Harvard University, Cambridge, USA-ahte a zir chhuak tawh bawk a ni.

Pu C. Lalsawta hian Central Service (IA&AS) ah kum 2 leh All India Service (IAS) ah kum 34 thawkin kum 40 chuang nihna hrang hrang a chelh tawh a. Asstt. Commissioner, SDO/Sub-Divisional Magistrate, Deputy Development Commissioner/ Zila Parishad CEO/ District Central Cooperative Bank Administrator, District 2-ah DC, Managing Director, Tribal Welfare Commissioner, Cane Commissioner, Divisional Commissioner, Principal Secretary, Planning Adviser-te hnate a thawk tawh a, Board leh Authority hrang hrang Chairman leh University 2-ah Vice Chancellor hna pawh a chelh tawh bawk a ni. Tunhnaiah khan  Bihar State pawhin Real Estate Appellate Tribunal-ah Administrative Member atan a rawn ruat thar bawk a ni. 

IA&AS a Accounts leh Audit lam a zirnate, Cooperative Bank leh Rural Bank a a tawnhriat te, Financial Management lama training a neihte, Principal Secretary, Finance a thawh chhunga a tawnhriat atangte hian sum-leh-pai vawn him leh hman dik lam hi a ngaipawimawh em em thin a ni.

District DC leh Divisional Commissioner hna a chelh chhung hian Appellate/ Revisional Court-ah Quasi-Judicial order te pass in case tam tak a chingfel a, sorkar hnathawkte disciplinary case tam tak a chingfel bawk. Chief Secretary tlukpui (IAS Apex Scale) a thlen hian hlemhletna dotu pawl (Vigilance) hotuah dah a ni a. A hnuaiah hian Vigilance Investigation Bureau, Special Vigilance Unit, Technical Examiner Cell te awmin Director General/ADG, Inspector General leh Engineer-in-Chief ten an hova. Heng bakah hian Department tinah Chief Vigilance Officer leh District tinah Vigilance Flying Squad-te an awm bawk a ni.

Eirukna leh hnathawh tha lo - corruption chi hrang an dona kawngah hian IAS leh IPS Officers bakah Head of Department engemawzat pawh case awrhtir an ni a, thamna la leh lak tum leh, sorkar sum tichingpen te, hnathawhah hlemhle tam tak an man bawk. Heng mi hlemhle nia ngaihte hi Vigilance Court leh Special Court-ahte case awrhtir niin Special Public Prosecutor rualten an bawhzui thin a ni. Heng bakah hian Departmental Proceedings-a hmalaknate pawh Chief Secretary te nen thlatin an thlir ho thin a ni.

Heng karah hian Officer fel tak tak thenkhat, thahnemngaihna avanga huaitaka thuthlukna siamte, an thuthlukna dik tawk loh avanga buaina tawkte pawh an awm nual thin a. Pamhamna leh rilru sual put vang ni lova, tisual palhte dik lo taka hremna tuar turte chhan pawh hi a ngaipawimawh viau thin bawk a ni.

Attachment

  • Loading attachment...