Governor Vakkom Purushothaman chuan vawiin khan First Mizoram Para Gliding Festival & Spot Landing kharna inkhawm Brigade Ground, Bawngkawn a neih chu a hmanpui. Kharna inkhawm hi Pu Vabeiha Hlychho, Director Tourism in a kaihruai.

Governor chuan Mizoram Tourism, 3 Dimensions Adventures leh Mizoram Aero Sports Association ten hlawhtling taka Para Gliding Festival an huaihawt chu lawmawm a tih thusawiin India hmarchhak hi aerial sports atana hmun tha tak a ni a, ram pawn leh tualchhung zin mite hip nan leh sum lakluhna tha tak a ni thei a ni, a ti a. Governor chuan Mizoram chu India rama state ralmuang anih avangin lo tlawh chak an tam tih a sawi a. Tourism lama hmasawnna atan sorkarin Draft Tourism Policy 2011 a siam chu khawvel in Mizoram an hmelhriat nan leh private sector ten he policy hmang a Mizoram tourism lama hmasawnna thahnem tak an buatsaih theihnan siam anih thu Governor chuan a sawi bawk. Khualzin mite kan hip that hian ram sum leh pai dinhmun a siam that bakah eizawnna kawng hrang hrang a siam thin a, chuvangin khualzin mite hip nan theihtawp chhuah zel turin Governor chuan a chah a ni.

Paragliding Festival and Spot Landing Competition-ah hian mi 38 telin Sweden atangin pilot pakhat, Nepal atangin pilot 17, Sikkim atangin pilot 10, Mizoram atangin pilot 6, Himachal Pradesh atangin pilot 3 leh Maharastra atangin pilot 1 an tel a ni.

Para Gliding lawmman late chu 1) Ram Prasad Gautam, Nepal Rs. 50,000 leh Trophy; 2) Man Bahadur Chhetri, Nepal Rs. 30,000 leh Trophy; 3) Bimal Adhikar, Nepal Rs. 20,000 leh Trophy.