Vawiin khan Raj Bhavan-ah Governor Lt. Gen (Rtd) MM Lakhera chuan Mizoram Journalist Association member te kawmna hun a hmang.

Governor chuan Journalist te chu mipui te hrechiangtu an ni a, harsatna kawng hrang hrang mipui ten an tawh thin te chinfel dan ngaihtuah pui turin a sawm a.Harsatna ramin kan tawh te tlangnel taka a hnena thlen turin a sawm a ni. Journalist te chu chanchin chhe lam chauh nilo, a tha lam leh Mizoramin kawng hrang hrang a  hma a sawnna te tarlang ve fo turin a chah a ni.

Mimal inkara harsatna a chhuah palh a  hnam leh hnam inkar tibuai thei tur zawnga mipuite rilru chawh thawh a ni thin chu pawi a tih thu sawiin hei hian Mizoram hmel a tichhia a ni a ti a. Heng kawngah  hian chanchinbu mite chu fimkhur turin a fuih a ni.

NLUP chungchang thu sawiin Governor chuan a hlawhtlin ngei  a pawimawh thu a sawi a. Sorkar laipui pawh hemi chungchangah hian a fimkhur em em a ni tiin Mizote hian he policy tha tak hi a hlawhtling thei ngei a ni tih entir a tul a ni a ti a. NLUP hi a hlawhtlin phawt chuan India ram pum tan a entawn tlak, sorkar laipui pawhin a Pilot Project hial a hman theih tura policy tha a ni tih a lantir dawn a ni a ti.