Vawiin chawhma dar 10:30 khan Health Directorate Conference Hall Dinthar ah Mizoram State TB Control Society chuan 2nd quarter chhunga an hnathawh thlirletna an nei.

He hun hi Dr.Gordon Zohmingthanga, State TB Officer in a kaihruaia, Dr.Lalthanmawia, Jt.Director, Malaria in he hun hi a hmanpui. Dr.Thanmawia chuan kal khawmte hma ah thusawiin Health Department hnuaiah hian programme hrang hrang a tam hle a, heng programme hrang hrang zing ah hian TB Control programme te hian an hnathawh dan thlirletna hun regular taka an hman thin avang leh tih tak tak na nena hna an thawh thin avangin lawmthu a sawi a. TB enkawlna chungchang ah hian vairam te anga mihring tam kan nih loh avang leh tawng khat hmang kan nih avangin State dangte aia hnathawh a nawm thu leh India ram a hna thawk tha ber nih kan tum tur ani ati. TB vei ten damdawi petu mithmuh lai ngei a damdawi an ei loh chuan TB damdawi ei tha lo te'n an vei thin MDR-TB chu mizo te zingah vei kan tam dawn a, chuvang chuan TB vei te'n damdawi ei hun chhung thla 6-8 chu a hun chhung a rei avangin bansan mai lovin, tha taka kan ei a pawimawh thu a sawi.

He Quarterly Review Meeting ah hian April - June, 2010 chhunga TB vei hmuhchhuah chungchang chhui bingna neih a ni a. District hrang hrang atangin District TB Officers te'n report an pe a. Tun kum April-June, 2010 chhunga Mizorama TB vei hmuhchhuah zawng zawng chu mi 590 an ni a, heng zinga mi 119 chu an khaka TB hrik hmuh a ni.

He meeting ah hian WHO atangin Consultant Dr.Gautam Borgohain, chuan a rawn hmanpui bawk a, Mizoram State Leprosy phar natna chungchang bakah  Mizoram State AIDS Control Society atangin HIV-AIDS leh TB natna inlaichin dan chungchang zirhona neih ani bawk. He meeting ah hian Mizoram chhunga TB Control Society hnuai hnathawktu hrang hrang te an tel tha hle a ni.