Vawiin chawhma khan Governor Dr. Kamla Beniwal chuan Mizoram Milk Producers' Cooperative Union Ltd.(MULCO) hnuaia Bawnghnute leh a kaihhnawih eitur chi hrang hrang sawngbawlna hmun Zuangtui veng ami chu a tlawh a. Hemi hnu hian Sericulture Department hmalakna hnuai a mi Silk Reeling and twisting factory leh Sericulture Training Institute, Zemabawk a tlawh leh a. Heng hmun pahnih a NLUP hmalakna hrang hrang te pawh Governor hian a endik nghal a ni. Governor hi a Secretary Pu Manoj Kumar leh mi pawimawh dang ten an tawiawm a ni.

Governor Dr. Kamla Beniwal chuan hmasawnna hrang hrang kan neih mek te chu zalenna avang te leh remna leh muanna avang te a lo awm thei a nih thu a sawi a. Ram in hma a sawn zel anga zalenna hlutzia te leh a sualchhuaktute ropuizia te pawh kan hre chiang telh telh dawn a ni a ti. Amah ngei pawh Cooperative societies ah hunrei tak, State Level ah te leh rampum huap bakah International Level ah te a theihtawp chhuah in alo tel ve tawh thin thu a sawi a. MULCO leh Sericulture hmalakna ah te hmasawn zel tumna a lang niin a hria a, heng hlawhtlinna te hi thil lawmawm tak a nih rualin tan lakna tur erawh a la tam hle a ni a ti.

MULCO Dairy Plant, Zuangtui ah hian MULCO hotuten Governor hi lo dawngsawngin an hmalakna te, hnathawktu awm zat, an society chungchang leh khawl hmanga Bawnghnute an sawngbawl thianghlim dan te bakah bawnghnute an hralhchhuah dan te kimchang takin an lo hrilhfiah a ni. Report a ziahlan dan chuan MULCO ah hian Society 34 a member 850 te chu member ni mekin heng zinga member 450 hian bawnghnute an chhunglut thin a ni a. Kum 2012-2013 chhunga MULCO in a sum thawhchhuah zat chu Rs. 13,14,01,875/- a ni a. Aizawl khawpui leh a chhevel khua ah te nitin chawhrualin bawnghnute litre 8000 zel MULCO chuan zuarchhawngtu dawr 219 ah te litre 1 zela Rs 2. hleptirin a zuar chhuak thin a ni.

Zemabawk Sericulture Complex hmuna Silk Reeling factory leh sericulture training institute te pawh Governor hian a tlawh nghal a. He lai hmunah hian Sericulture Minister Dr.B.D. Chakma leh Sericulture Department hotute chuan Governor hi lo tawiawm in an hmalakna hrang hrang te an lo hrilh a. Silk pangang tha chi muga khawina hmun Muga Culture pawh Central Silk Board in Assam atanga Mizoram a sawn a tum thu an lo hrilh nghal in a theihna zawn a an mahni tanpui turinan lo ngen a ni. Tun dinhmun ah Zemabawk Sericulture Complex ah hian thawktu nghet 45 leh muster roll 37 an awm a ni. Reeling and twisting Factory ah hian Silk la hlum siamchhuah hna, Silk lazai sin siam hna te leh Silk rawng hnawih hna te thawh a ni.

Governor pual a Sericulture Complex Training Hall a programme tawi siam chu Pi C. Zothankhumi, Secretary, Sericulture Department in kaihruaiin he hunah hian Sericulture Department hnuaia NLUP hmalakna hrang hrangte pawh tarlan a ni.