Vawiin khan Finance Minister leh Taxation Department enkawltu Minister ni bawk Pu Lalsawta hovin Taxation Department hotulu, officer leh hnathawktu dangte chuan Assembly Secretariat Annex, Conference Hall-ah meeting an nei a. Meeting ah hian Parliamentary Secretary Pu K. S. Thanga leh Finance Commissioner leh Taxation Department Secretary ni bawk Pi L.N. Tochhowng te an tel bawk. Meeting hi Commissioner of Taxes Pu Lalthangliana Varte chuan kaihruaiin thuhma a sawi a. Meeting ah hian Taxation Department officer leh thawktu dangte an tel kim hle a ni.

Finance Minister Pu Lalsawta chuan zalen taka chhungkua anga Taxation Department chuan engtin nge chak zawk a hma a lak ang a , tu mah intauhbuai lova, mipui leh ram tana a tha ber tur ngaituah ho tura meeting neih a nih chu tha a tih thu a sawi a. Taxation Department chu Mizoram hmasawn chhoh zelna turah rahbi tuktu leh buatsaihtu pawimawh tak a ni, a ti.

Taxation Department chu Department danga a sem tur emaw, pek tur emaw nei nilo Dan in a tih anga mite hnen atanga chhiah la leh a khawntu an nih thusawiin heng chhiah chhunkhawm te hi mipuite enkawlna leh hmasawnna atan hman a ni a. Chuvangin Taxation Department chu mite hnen atanga chhuhsaktu nia ngaih an nih avangin Department a thawk a hnuai berah atanga a sang berthlengin mi dawr nuam tak, zawldawh thei tak a nih reng a tul a, mi vin thei an ni lo tih te hi hriat a pawimawh hle a ni, a ti.

Department khat a thawk te inkarah thawhhona leh inhmangaihna te a that a, a thuk chuan Department-in hma chak takin a sawn theih thu sawiin Minister chuan he hun a Taxation Department kalkhawmte chu insawiselna leh inngaihlohna te pumpelh a, thawhhona leh inlungrualna tha tak engtik lai pawhin nei reng turin a chah. A theihna kawng apiangah economize renchem dan zir a hemi kawnga hma la thin turin a chah tel bawk.

Pu Lalsawta chuan Mizoram sum dinhmun a that loh rualin ram pum leh state tam zawkte sum leh pai dinhmun te pawh hi a tha lo a, mahse khawi state dinhmun mah a tha lo a lawm tia inhnem lovin Mizoram sum leh pai dinhmun siam that tum a, Tax leh Non-Tax Revenue atanga sum tam zawk kan hmuh theihna turin leh resource mobilization atan te ruahmanna siam a, hma chak tak a lak mek anih thu a sawi a. Nakin lawka chuan bung thar kan kai dawn, hemi atan hian Sawrkar kalphung chu nasa tak a tih danglam a ngai dawn an ni tiin Taxation Department chu hemi atan a bultumtu, a hmahruaitu leh a hnungdawltute an nih tur thu a sawi bawk.

He hunah hian Parliamentary Secretary Pu K. S. Thanga pawhin thusawiin Taxation Department mawhphurhna leh Sawrkarin a beiseina chu a san thusawiin Central project atana state matching share atan sum mamawh za zelah 80 vel Taxation Department thawhchhuah atangin kan phuhruk a ni, a ti.

Meeting-ah Finance Commissioner Pi L.N. Tochhawng pawhin thu a sawi a, Mizoram Taxation Department chanchin tawi leh an hmalakna leh hmachhawp chungchangte chu Pu L. H. Rosanga, Deputy Commissioner of Taxes in a sawi bawk a ni.

Taxation Department hi kum 1975 Mizoram UT anih laiin Land Revenue& Settlement Deparment hnuaia peng pakhat, Inspector of Taxes pakhat atanga bul tan a ni a, 1988 khan Taxation Department chu Directorate hran a siam a ni. Kum 2009 khan Taxation Department mi leh sa chu Commissoner of Taxes atan dah niin Department hi a enkawl mek a ni. Commissioner of Taxes hian Registrar of Firms & Societies hna hi a hmuiin Taxation Department hian Firms & Societies hi an enkawl bawk a ni.

Mizoram pum hi Zone 10 a then niin chung zingah Zone 3 chu Aizawl ah a awm a, Zone dangte chu District khawpui tinah an awm mek a ni, Zone te hi Assistant Commissioner of Taxes ten an enkawl mek a ni. Heng bakah hian Checkgate 4 an nei bawk. Tunah hian Department hnuaia a nghet a thawk 290 leh Muster Roll a thawk mi 96 a zavaiin mi 386 an awm mek a, post hnawhkhah loh 41 an nei bawk.

Taxation Department chuan Sawrkar kum 2010 - 2011 ah cheng vaibelchhe 113.97; 2011–2012 a cheng vaibelchhe 149.49; 2012 – 2013 a cheng vaibelchhe 185.29 leh 2013 – 2014 a cheng vaibelchhe 200.44 te chu chhiah atanga sum an hmuh a ni.