Vawiin chawhnu dar 1:00 khan DC Meeting Room, Serchhip-ah Addl DC. Pu V.L. Remliana hovin World Polupation Day hman a ni a, Dr. Laldawngliana Sailo, Chief Medical Officer chuan Resource Person niin a hmanpui. Kumin World Population Day thupui chu ‘Planned Family, Endless Happiness’ tih a ni.

He ni hmannaah hian India ram chu mipui tamna leh tam chak berna ram zing a mi, tun dinhmuna mihring tluklehdingawn khat leh maktaduai zahnih (1.2 billion) chuang lai awmna a nih thu tarlan a ni a. Tun ang renga kan pun chak chuan kum 2013-ah chuan mihring tluklehdingawn khat leh a chanve lai kan tling thei dawn a, chu chu ram hausakna leh chute zat mihringin an mamawh tur ngaihtuahin thil huphurhawm tak a ni dawn a, hei vang hian India ramah chuan mihring pung chak lutuk tur ven a, thunun hi tihmakmawh a ni tih sawilan a ni.

He huna Resource Person, Dr. Laldawngliana Sailo chuan Family Planing awmzia chu fa neih tlem ringawt ni lovin ruahmanna fel tak nei chunga chhungkaw din a ni a ti a. Fa neih zat tur pawh intuk saka chuti zat neih chu a tha tih leh chuti zat chu a tawk intihsak ngawt theih a nih loh rualin, chhungkuain kan sum lakluh zat te, nungchang tha, zirna tha leh rilru puitling an neih theihna tura kan enkawl theih zat tur ngaihtuah chunga chhungkua din hi a thain a him a ni a ti bawk.

Pu Dawnga chuan nu hriselna atan chhang khât a tha tiin chhang zing lutuka nau neitu nuin rilru leh taksa hrisel tak neih a harsat thu a sawi bawk a, chhâng tikhat turin sawrkarin ruahmanna hrang hrang a neih thu leh chungte chu man chawi ngai lo leh pawn lamah pawh man tlawm te te hmanga neih theih a nih thu a sawi nghal bawk.