Mizoram Governor Lt. Gen. Nirbhay Sharma (Retd) PVSM, UYSM, AVSM, VSMchuan nimin khan Indian Chamber of Commerce te sawmna angin Mumbai-ah Maharashtra sawrkar aiawh te leh investor kalkhawm te chu Mizorama investment hrang hrang a luh tam theih dan tur a sawipui. 

August Ni 12, 2017-a Indian Chamber of Commerce ten ‘Interaction with Hon'ble Governor of Mizoram’ an buatsaih ah hian Governor chuan Mizoram chu India rama State ralmuang berte zing ami a nih thu leh a hmun leh mipuiten an zir avanga invest-na hmun tha a nih thu a sawi a. Mumbai a sumdawnna lian kalpui tute kawlkhawm chu Mizoramah rawn kal a, investment opportunity-te zir a, Mizorama rawn invest ve ngei turin a sawm a ni.  He hun hmanga kalkhawm investor-te chuan Mizoram chu rawn tlawh a, Mizo mipuite thawhpui an tum tur thu an sawi a ni. 

He hunah hian Maharashtra sawrkar atangin Shri Bijay Kumar IAS, Principal Secretary to the Government of Maharashtra hovin senior officer engemaw zat an tel a. Investor-te atangin Farmer Association te, Mega Food Park enkawltu te, Food Processing industry neitu te, thei a hlawm a lei thin company atang te, hotel, health leh banking sector atang tein an tel tha hle a ni. 

Governor hi Dr C. Vanlalramsanga, Planning Secretary leh Pu Sangzela Tlau ten an tawiawm a. Meeting-ah hian Dr C. Vanlalramsanga chuan Mizoram economy dinhmun leh investment opportunity hrang hrang a lem nen entirin presentation a pe a. Pu Sangzela Tlau pawhin Tourism Sector chungchang presentation hmangin chipchiar takin investment opportunity awm te a kawhhmuh bawk a ni. 

Maharashtra sawrkar hotute nen hian sawi hona tha tak neiin thawkho zui zel turin thu an dah a. Mumbai leh Aizawl ah te road show neiin Mizoram leh Maharashtra sumdawng mite an thawh hona turin hmalak zui an rel a ni.