Mizoram Chief Electoral Officer chuan mipuite hriattirna a hnuaia mi ang hi vawiin ni 14.8.2017 hian thu a chhuah :
ERONet hi IT hmanga electoral roll enkawlna a ni ber a, a hming hi Constituency tina roll enkawltu ber Electoral Registration Officer (ERO) te behchhan a phuah a ni. Roll enkawlna software tuna hman mek ERMS aia kawng tam taka tha zawk tura ngaih a ni. ERONet hian electoral roll enkawltute hna a tihawlsam phah a beisei a ni a, tin, electoral roll a thil dik tawk lo awm thei hrang hrang, entirnan- transfer leh chhan dang avanga hming chuang nawn, hming leh elector chungchang dang diklo, kum tling lo roll-a chuang, adt. a tih bo deuh vek theih rin a ni. Tin, ERONet hi tuna election dan leh hrai kan zawm mek te, a bikin the Representation of the People Act 1950 leh 1951 te leh hemi hnuaia Rules leh Notification hrang hrang awm te zawm leh behchhana uluk taka siam a ni bawk.
ERONet tangkaina :
1. Mipui Tan :
- Online-in application a thehluh theih a, application-in a thlen chin sms notification hmangin a diltu hriattir zel an ni ang. Online application thehluhna hi nvsp.in a ni.
- Constituency danga insawn (transfer) dawnin awmna hluia hming paih kher a ngai lo, awmna thar Roll-a a luh hunah a system hmangin an lo delete mai dawn a ni.
- Online-a application thehluh a nihin a process chhung a rei lo lehzual tura ngaih a ni a, hun rei lo te chhungin application approve/reject a ni thei ang.
2. A thawktute tan :
- ERONet atang hian data entry zawng zawng tih tur a ni a, application hrang hrang te chu Electoral Registration Officer ten verification tul ang an tih hnuah ERONet atangin an approve/reject thin dawn a ni. Mobile site leh mobile app version te a awm avangin awlsam takin office-a thut lai kher loh pawhin hna a thawh theih dawn a ni.
- Mobile atanga hna a thawh theih avangin broadband internet neih kher lohnaah pawh hna a thawh theih ang a, tin, internet data a mamawh a tlem vangin internet chak lutuk lohna hmunah pawh hna a thawh theih dawn a ni.
- Data entry atan offline mode a awm avangin internet that loh lai pawhin data entry chu a tih theih reng dawn a, a hnuah a upload leh mai theih dawn a ni.
- Official pawimawh Chief Electoral officer, District Election Officer/DC te leh ERO ten an bial chhung theuha electoral roll dinhmun hrang hrang chu dashboard hmangin an endik thei reng dawn a, summary roll revision lai pawhin a thawktute hna thawh zat a endik reng theih dawn a ni.
