Vawiin chawhma dar 10 khan Fisheries Department, Serchhip District chuan Sangha thianghlim leh tharlam tam zawk mipuiin eitur kan hmuh theih nana Sangha dil siam beihpui thlakna "Blue Revolution Zuangleng"  chu Sailiam Kawn Serchhipah an hmang.  

He hun hmanpuitu District Bawrhsap Pi Sangchhin Chinzah chuan thu sawiin, Serchhip District kan vanneihzia leh sawrkar hmalakna zarzotu kan ni chu lawmawm a tih thu a sawi a. India sawrkarin kut hnathawktute a ngaipawimawh hle a, tun atanga kum 5 a vei leh chuan kut hnathawktuten tuna an thar chhuah let aia tam an lo thar chhuah theih nana hmalakna lian tham tak tak a ruahman ani a ti a. Sangha dil thar siam turte hnenah malsawmna an dawnah lawm nachang hriaa, thahnemngai tak leh rim taka hnathawka hlawhtlinpui ngei turin a chah a ni. 

Pi Zonuntluangi, DFDO Serchhip District chuan Blue Revolution Scheme chu sawrkar laipui atanga scheme thar anih thu leh kan chenna ram leilung leh lui kan neih atanga a tam thei ang ber Sangha tharchhuah alo nih theih nan leh Sangha khawitute sum lak luh alo pun a, ram mipuite pawhin Sangha tam zawk eitur kan neih theih nan Blue Revolution Scheme hi sawrkar laipui chuan a duang chhuak a ni, a ti. 

He hun hi Pu Hmangaihthanga, President, Fisheries Association, Serchhip District chuan a kaihruai, Sangha dil laitu tur Khawl pariat (8) te chu Pi Sangchhin Chinzah, Bawrhsap chuan a vailiam ani. He Scheme hnuaiah hian Serchhip District huam chhungah Sangha dil thar eng emawzat laih anih dawn bakah Sangha dil hlui eng emawzat thawm that a ni dawn bawk a ni.