Vawiin chawhma ah khan Mizoram University Auditorium ah National Institute of Technology (NIT) Mizoram chuan Convocation vawi 1-na an hmang a. He hunah hian Mizoram Governor Lt Gen Nirbhay Sharma (Retd.) chu khuallian ah hman a ni.

NIT Mizoram in Convocation a vawikhat nan an hmang thei chu lawmawm a tih thu sawiin Mizoram Governor Lt Gen Nirbhay Sharma (Retd.) chuan NIT Mizoram hlawhtlinna ah zirlai, zirtirtu leh nu leh pa te a lawmpui tak zet tih a tarlang a. Mizoram in Technological College tha ber zinga chhal theih NIT Mizoram a nei chu vanneihthlak a tih thu sawiin Mizo mipui in kan hlut a ngai a ni a ti a. NIT Mizoram ah hian Mizo zirlai atam thei ang ber an luh theih nan tuna Pawl 12 zir mek te chu JEE(MAIN) paltlang thei tur in an inpuahchah a ngai a ti. "Kan ram leilung hausa mahse a chhunga cheng, mipui kan la rethei  em em a. He kan retheihna ata min chawikang tur hian science thiamna aia pawimawh a awm chuanglo", ti in ram hmasawnna atana science zirna dah pawimawh a tul thu zirlai te hma a thu a sawina ah hian  a tarlang a.  "Engineering  degree nei thar thalai thluak tha tak te hian hnazawng rilru pu lovin mahni kutke a dinchhuah leh bul tan intihhmuh se, midang tana eizawnna hna siamtu nih tum bawk se, tun aia nasa zawk in kan ram hian hma a sawn ka ring", a ti. Governor chuan NIT hmunhma Lengpui ram chhunga buatsaih mek chu a chhehvel ram hnim hnah leh ramhmul te ti chereu lo zawnga hmalakpui  ni se a duh thu NIT Mizoram hotute chu a hrilh a. NIT Mizoram campus  chu 'Green NIT Mizoram campus'  ni ngei se a duh thu sawi in NIT in Lengpui khua chu 'adopted village' atan an thlang chu khawtual mi tan hmasawnna a nih ngei a rin thu a tarlang a ni.

NIT Mizoram Convocation vawikhatna hi Prof. U.C. Ray, Director and Chairman, Board of Governors & Senate, NIT Mizoram chuan a hawng a. Convocation hawnna thuchah tawi a sawi hnu in NIT Mizoram report a pe chhunzawm  nghal a ni. Report a tarlan a nih dan chuan NIT Mizoram hian kum 2010 ah khan VNIT Nagpur puihna in engineering branch 3 : electrical & electronics engineering,  electronics  & communication leh computer science & engineering ah zirlai 63 la lut in bul a tan a. Kum 3 hnuah mechanical engineering zirna hawng in kum 4-na ah civil engineering branch a hawn belh a. Tunah hian heng engineering branch 5 ah hian Bachelor of Technology (Btech) zirna kalpui mek a ni. Ph.D  zirna pawh heng engineering subject 5  bak ah physics, chemistry, mathematics, humanities leh social science subjects ah te a hawng mek bawk.

NIT hnuaia zirna branch tin ah te  hian seat 30 zel a awm a, chung zinga 50% chu Mizoram chhung mi leh sa,  Joint Entrance Examination(JEE) Main paltlang te tana dah bik(reserved) a ni a, a bak hi midang tana ruahman a ni.

NIT Mizoram convocation vawi 1-na ah hian mi 108 hnenah engineering degree hlan a ni a. Heng degree nei thar te hi 2010 leh 2011 batch engineering zirlai te kha niin an zir zawh hma atanga hna thawh tur  zawrh leh an zirchhuah hnua hna hmu nghal deuh vek an ni a; convocation ah pawh hian inlan thei an tlem hle a ni. Tech Mahindra, Infosys, TCS, L&T, IBM, NSE, HP, Wipro, Nile stream, Bespoke, Polaris Fin Tech, Reinspire tech, KEC Int, etc te chuan NIT Mizoram ah hian Campus interview an rawn nei tawh a. 2010 batch zinga zirlai 67% leh 2011 batch zinga zirlai 77% chu final year an zir kum ah hna an pe nghal a ni.