Vawiin chawhma dar 11 khan IASE Auditorium-ah National Seminar on 21st Century Challenges in Teacher Education neih a ni a, Governor Lt. Gen. Nirbhay Sharma, PVSM, UYSM, AVSM, VSM (Retd) chuan khuallian niin a hmanpui a, Parliamentary Secretary Pu H. Zothangliana chu khualzahawm a ni. Seminar hawnna inkhawm hi Pu K. Lalnghinglova IAS, Commissioner, Higher & Technical Education in a kaihruaia, Prof. S.B. Menon, Vice Chancellor Ambedkar University New Delhi in thupui hawnna a nei.

Governor chuan, tunlai khawvela chona lian ber chu tunlai mila zirtirna pek thiam hi a ni a, Mizoram pawh India ramah ziak leh chhiar thiam ah pathumna kan ni a, mahse hei hian eizawnna tha leh hauhsakna a keng tel kher lo a ni a ti. Kan thalaite hian Graduate leh Post Graduate degree ringawt ni lo  sumdawnna emaw kawng dangah  eizawnna tlak thiamna an mamawh hle nia a hriat thu a sawi a. Governor chuan sorkar hnathawk mithiamte leh zirtirtute hian kan naute hi an than chho zel nan zirna tluantling nei tura zirtirna an pek a tul hle a ni a ti a, tun hma lama zirna kan lo kalpui tawh dan ang chu thlak danglam a hun tawh hle a ni, a ti a. Ram leh hnam tana chhawr tlak zirna tluantling kan neih theih nan mipakhat chauh phur a tawk lo a, zirtirtu tha kan mamawh rualin zirlai naupang mahni tuma chiang leh nu leh pa fate kalna tur ngaihtuahpui thiam leh an fate phurpui thiam kan mamawh a ni, a ti. Governor chuan Zirtirtute training petu Zirtirtute chu a tha zawnga khawvel inthlak danglamna kawnga hmahruaitu leh ban pawimawh tak ni thei turin a chah bawk.

Pu H. Zothangliana, Parliamentary Secretary chuan, IASE hian zirna lamah an din tirh atangin hna an thawk tha thin hle a, tuna zirlai leh zirlai lo la awm tur zel tan pawh chhawr tlak a la nih zel a beisei thu a sawi.

Institute of Advanced Studies in Education (IASE) hi kum 1975 khan Mizoram Institute of Education tiha din a ni a, tun ah hian zirtirtu 20 awmin, B.Ed (regular), B.Ed  (Multi-Mode Programme) leh M.Ed zirtirna an pe mek a ni.