Vawiin khan District Agriculture Office Conference Hall, Kolasib-ah Kolasib District chhunga NLUP 2nd Phase-a WRC-I thlangtu chhungkua 191 zinga chhungkaw 76 hnenah an hnathawh leh zelna tur 3rd Installment pawisa Rs. 30,000/- (Singthum) theuh Pu R. Lalnunzira, DAO Kolasib chuan a hlan.

He hun Pu Lalmalsawma, Sub-Divisional Agricultural Officer, Kolasib District kaihhruaiah hian Pu R. Lalnunzira, District Agriculture Officer, Kolasib District chuan WRC-I thlangtute hnenah Mizoram in Buh khamkhawp kan tharchhuah theihna tur atana pawimawh tak Buh chinna tura WRC-I siam an thlang chu lawmawm a tih thu a sawi. Kolasib District hi leilet awm tamna leh siamna tur hmun rem tak anih rualin kan leilet enkawl dan hman mek avanga Buh tharchhuak Mizo te intodelhna tura kan changtam tawk lo leh leilet enkawltu hnamdang te thuhnuaiah kan awm lutuk ni a a hriat thu chu pawi a tih thu a sawi bawk. NLUP a WRC-I thlangtute chu sawrkar  atanga tanpuina an dawnte dik taka hmang turin leh an leilet theihtawp a enkawl a a hlawkna pawh Mizoram atanga luangchhuak lo zawnga enkawl tum turin a chah.

He hunah hian Pu Joseph Lalnuntluanga, ASEO chuan “Him zawka rannung thahna hlo leh tangkai zawk a leitha hmandan” chungchangah zirtirna a pe a, Pu Rambuatsaiha, Deputy Project Director (ATMA) in NLUP Work Calendar mil a hnathawh dan tur leh S.R.I. leh I.P.P. hmanga buh hlawk zawk a chindan a zirtir bawk.

He hun hi Pu Lalengliana, Subject Matter Specialist (Agronomy) in kal khawmte hnenah lawmthu a sawi zawhah tih tawp a ni.