Mizoram Governor Pu Vakkom Purushothaman chuan vawiin khan Luangmual – a Old Age Home a tlawh. Governor hi Pu Lalrinliana Fanai, IAS, Commissioner, Social Welfare, Pu Manoj Kumar, IAS, Secretary to Governor, Pi Vanlaldini, Director, Social Welfare Department leh officer dangten an tawiawm a. He Home enkawltu Warden leh a thawhpuite bakah Department atanga amah tawiawmtute titi puiin Home enkawl chungchanga an harsatna leh mamawh hrang hrangte a ngaihthlak sak. Governor hian Home-a awmte hi Blanket 1 theuhin a pe bawk.

Tunah hian Tar Chawmna Inah hian mipa 5 leh hmeichhia 3 an awm a, 1st March, 1989 khan Mission Veng-ah mi In luahin bul tan a ni a, heta tang hian June ni 20, 1990 khan Durtlang-ah sawn a ni leh a, mahse, helai hmun hi thlasik ah a vawh thin em avangin tuna an awmna hmunah hian 5.11.1996 ah an insawn leh a ni.