Vawiin khan Law Minister Pu Lalsawta chuan I&PR Auditorium-ah Pu Laldova lehkhabu ziak “History of Chittagong Hill Tracts” a tlangzarh.

Pu Lalsawta chuan mahni thlahtute chanchin thui tak chhui tur hre lo, mahni hnam chanchin hre mang lo hi Mizo zingah a tam zawk kan nih laia Chittagong Hill Tracts-a Zofate leh an chhehvela cheng hnamte chanchin chipchiar taka ziakna lehkhabu Pu Laldova’n a buatsaih thei chu chhuanawm tiin, Mizo hnam tana thil hlu leh rotling a ni ngei ang, a ti. Mizo hnam kan nihna hi kan duha kan pawm leh kan duha kan hnawl theih a ni lova, hnam khat unauza kan nih miau avangin khawvel siam chawp ramri hian min then hrang tur a ni lo, Minister chuan a ti a. Hnam hi tlahniam leh boral thei a ni a, Mizo hnam tlemte hi kan inpumkhata a kan tanrual erawh chuan tun atanga hun reiloteah hnam ropui tak kan la ni thei ngei ang, a ti bawk.

Lehkhabu tlangzarh programme hi Pu Vanneihtluanga’n a kaihruai a, Pu Lalhruaitluanga Chawngte chuan thlirlawkna hun a hmang a ni.