Vawiin khan Durbar Hall, Raj Bhavan-ah Governor P.S. Sreedharan Pillai chuan rinawmna thu tiam tirin Pu Lalramthanga Tochhawng, 1986 batch IA&AS(Retired) chu Chairman, Mizoram Public Service Commission(MPSC) atan a la lut.

Chairman, MPSC lakluhna puala Oath Taking Ceremony hi Chief Secretary Pu Lalnunmawia Chuaungo chuan a kaihruai a. He hunah hian Pu Zoramthanga, Chief Minister leh a thawhpui Deputy Chief Minister Pu Tawnluia, Cabinet Minister te, Minister of State te, MLA te, Board Vice Chairman te, sawrkar mi pawimawh te leh sawmbik te an tel a ni.

Pu Lalramthanga Tochhawng hi Pu Lalthanzama(L) leh Pi Neihthangi te fapa niin kum 1960 June 20 khan a lo piang a. Thiamna lamah amah hi M.Phil, M.A.(Socialogy) degree nei a ni a. Kum 1986 khan Indian Audits & Accounts Service(IA&AS) ah a inziak tling a. India ram hmun hrang hrang hna thawk kualin tawnhriat nei tha tak a ni. Mizoram sawrkar hnuaiah pawh Director & Secretary, Social Welfare Department leh Director, Secretary & Commissioner, Agriculture Department hna te a chelh tawh a. Kum 2007 ah Accountant-General Office Mizorama din anih khan Accountant-General hmasa ber a ni a, kum 2011 ah Principal Accountant General ah kaisangin Principal Accountant General hmasa ber a ni leh a. Kum 2015 a Telengana State siam thar anih khan he state atana Principal Accountant General (Audit) hmasa ber ni turin sawn a ni a, kum 2019 January thla khan Principal Accountant General, Mizoram ni turin a rawn kir leh a. August 1, 2019 khan Mizote zinga pakhatna ni turin Additional Deputy Comptroller and Auditor General, HAG+ Grade, Pay Matrix-a Pay Level 16 ah a kaisang leh bawk a ni.