Vawiin khan Art & Culture Minister Pu R Lalzirliana chuan DIET Auditorium Chaltangah, Gandhi at 150 thupui hmanga Rampum huap inelna National Essay and Painting Competition, Indian National Trust for Art and Culture Heritage (INATCH) Mizoram Chapter leh School Education Department tangkawpten Pawl 6 leh Pawl 10 inkar zirlaite tan an buatsaih chu a hmanpui.

Pu R. Lalzirliana chuan Mizorama zirlaiten India ram pum huap inelna hmachhawn theihna hun remchang an nei chu lawmawm tiin inelna hlutzia hria inelna zau zawk leh sang zawk a tel thei tura insuatsaih chho turin zirlaite a fuih a. Gandhi a chanchin a sawina Minister chuan Gandhi nunah zir tur tam tak – tawng tlem ni chunga midang thusawi chik leh ngaituah te, mahni aia midangten dinhmun tha chelh se tih duhna rilru neih te, inngaihtlawm te, tumruhna te chu entawntlak ni a hriat thu sawiin naupangte chu harsatna leh tlinlohna hrang hrang hneh turin tumruhna leh inpekna nei turin a fuih a ni.

Art & Culture Minister chuan Gandhi a zirtirna pawimawh tak – faina leh thianghlimna chungchang sawiin zirna tel in, kawng hrang hranga hma nasa takin kan sawn a, hmasawnna leh changkanna hrang hrang te kan hmu pha zel a, chutih rualin kan thenawm leh khawtlang zalohna hian faina kawngah nghawng na tak a nei niin a lang a ti a. Bawlhlawh leh hnawmhnawk paih kawnga kan inthlahdahna hian kan vela mite leh kan ram kan ngaihpawimawh loh zia a tilang thin a tiin naupangte chu an nunah faina leh thianghlima te chu naupan tet atanga ngaipawimawh turin a chah a ni.

Pu P. Rohmingthanga IAS (Rtd.) Convenor, INTACH Mizoram Chapter chuan programme kaihruaiin INTACH hnathawh leh School Education Department te thawhhona dan a sawi. Pu Zohmingthanga, Deputy Director, School Education Department pawhin thu sawiin hun kharna a hmang a ni.

INTACH hi India ram pum huap a themthiamna (art) leh hnam ro humhalh leh chawisangtu pawl hi 1984 atang khan din a ni a, Mizoram Chapter pawh hi hemi kum vek hian din a ni. He pawl din chhan leh an tum chu India ram a hnam tin ten kan pipute atanga rochun thil hnam ro bo pil mai tur humhalh leh chung thil te chu venhim a tulzia inzirtirna neih thin hi a ni. Kum 2010 atang khan zirlaite zingah helam hawi zawng a competition te hi All India level huapin a siam thin a, kumin hi Gandhi a pianchamphaphak 150-na a nih avangin Gandhi at 150 tiin Essay and Painting Competition buatsaih a ni. Kumin inelna ah hian naupang 97 an tel a ni.