Remna leh inpumkhatna tlangaupuia mahni chauhva car hmanga India ram fan chhuah tum Mumbai tlangval Amit Lall chuan ni 14 March, 2009 (Inrinni) khan Aizawl a lo thleng a. Vawiin chawhnu khan Mizoram Governor Pu M M Lakhera nen Raj Bhawan-ah an inkawm a ni.

 

 

Mizoram Governor chuan Pu Amit Lall chu remna thu kenga India rampum a fanchhuah tum chu a ropui a tih thu a hrilh a. Ram leh hnama chian, mahni ram chhuan leh inpumkhatna rilru put te chu tunlai India ram mipui a bik takin thalaite zingah chawhnun a tul hle a ni, a ti.

November ni 26, 2008-a mi tam tak thihna thlentu terrorist hovin Mumbai-a hotel leh hmun dangte an beihna a taka hmutu Amit Lall chuan min beitu kan hmelmate bei let a, ram leh hnam humhim tura mipuite inpumkhatna chhem alh tur hian India ram fanchhuah a tum thu a sawi a. Aizawl a thlen ni chu Mumbai a chhuahsan ni 26 January, 2009 (Republic Day) atanga chhutin a ni 50-na chiah chiah a nih thu sawiin Amit Lall chuan Mizoram chu a peace mission golden jubillee hmanna hmun a ni, a ti. Mizoram mipui leh chanchinbumi ten an thlawpzia leh an duhsakna an hlannaah a lawm thu Governor chu a hrilh bawk a ni.