Vawiin chawhma khan Governor Kummanam Rajasekharan chuan Tuikual Vengah Salvation Army enkawl, Nau Hnucham Run( Motherless Babies Home) a tlawh.

Hnucham Runah hian Governor Kummanam Rajasekharan chu Commissioner Lalzamlova, Territorial Commander leh Salvation Officer pawimawh ten an lo lawm a. Naupangte enkawldan leh hmunhma te a enkual hnuiin Governor chuan Hnuchham Run enkawltu te fuihna thu tawi a sawi a. Hnuchham, fahrah leh riangvaite enkawl hna chu thil ropui tak - khawtlang, mahni mihringpuite leh Pathian rawngbawlna a ni a ti. Hnuchham enkawlna kawngah amah ngei pawh a lo thawh ve thin thu te, an rawngbawlna kawngah enge maw ti kawnga tanpui ve theihna te a nei a nih phei chuan a inhawn reng thu a sawi a.  Mizoram hmun dangah nu leh pa enkawltu neilote  enkawlna hmundangte pawh engemaw zat a awm tih a hriat thu sawiin atahtawla la tlawh kual a tum thu a sawi a ni.

Hnuchham Run a lo din chhuah dan sawiin Commissioner Lalzamlova chuan, "Kulikawnah kum 1940 khan Salvation Officer thutkhawmnaah Officer pakhatin Nausen pianghlim, a hringtunu in a thihsan chungchang a sawichhuak a. Midangin an thil hriat te lo sawi ve zelin officer te chuan an hlawh atanga pawisa thawhkhawma bul tan an remti tlang a. Chuta tang chuan hnuchham enkawl hna an lo  tan a. Kum 1952 January thlaah Hnuchham Run hi mumal zawka din leh enkawl tan a ni. Mizoramah chuanMotherless Babies Home hi Hnuchhamte Run  hmasaber a ni", a ti. Tunah chuan sawrkarin  Hnuchhamte enkawlna dan mumal takin a siam tawh a.  Home pakhata enkawl theihzat te felfai leh awmze nei takin a siam a tawh a ni a ti.

Motherless Babies Home, Tuikual chungchang bikah Captain Lalmuanpuii Sailo, House Superintendent   chuan report tawi a pe a. Salvation army enkawl,  Hnuchham Run chu Nausen leh Kum 6 inkar te enkawlna  a ni tih a sawi a. Tun dinhmunah hmeichhe naupang 7 leh mipa naupang  7 an awm mek a. Awmchilhtu Home Mother 7 leh lehlanga thawk staff 7 in naupangte leh inchhung hi an enkawl a.  An inenkawl dan leh an inkaihruainate hi Sawrkar programme, Integrated Child Protection Scheme(ICPS) duhdan thlapa kalpui a ni a ti. State leh Central atangin Official te chuan  an hmalakna te leh Mizoram hmun hrang hranga midang te enkawl Home te pawh  an vil reng  a ni a ti a. Motherless Babies Home hian rampum huapa hnathawk tha chawimawina " National Award for Child Welfare, 1996" chu kum 1997 khan India President hnen atangin a dawng tawh bawk a ni.