Serchhip District chhung Assembly Constituency pathuma duty tur ten nimin atang khan Postal Ballot hmangin vote an thlak tan a, naktuk hian thlak zo tura beisei an ni.

Serchhip DC Office Complex-a Postal Ballot Facilitation Centre-ah inthlannaa duty turte tan Postal ballot hmanga vote thlakna hun siam sak niin, venhimna hna thawktu turte leh driver te pawhin vote an thlak nghal a ni. Polling Station hrang hranga Presiding Officer, Asst. Presiding Officer leh Polling Officer te tan kar hmasa zirtawp leh inrinni khan Training an neihna hmunah Postal Ballot vote hi thlak tir an lo ni tawh bawk. Nimin vek khan Police Training School (PTS) Thenzawl a awmte chu Postal Ballot hmanga vote thlaktir an ni bawk a, PTS a vote thlak zawng zawng hi mi 403 an ni.

Serchhip District chhung Assembly Constituency pathuma duty turten vote thlak mek hi tun dinhmunah 26 Serchhip A/C ah vote 213, 27 Tuikum A/C ah vote 91 leh 28 Hrangturzo A/C ah vote 101 a tla tawh nia chhinchhiah niin, District pawn lama kal tur vote tla 111 a awm tawh bawk nia chhinchhiah a ni a. Serchhip District chhunga Postal vote, he report buatsaih lai thlenga chhinchhiah zat hi 919 a tling tawh a ni.

Postal Ballot hmang vote thlak hi naktuk 21.11.2018 thleng hawn a ni dawn a ni.