Vawiin chawhma khan Mizoram Governor Kummanam Rajasekharan chuan Seling Zeropoint hmuna Samaritan Riangvai Run a tlawh a. Hetah hian Project Pushpak BROWWA in Charity Programme Cum Medical Camp a buatsaih chu a hmanpui a ni.
Governor Kummanam Rajasekhara chuan Mizoram tana kum 51 chhung zet chhum lo chat lova hmasawnna kawng hrang, a bikin kawngpui siam hna thawktu Border Roads Organisation(BRO) hnathawkte leh midang te tana inpe pumhlum, Home enkawltute chungah lawmthu a sawi hmasa a. BRO Wives Welfare Association(BROWWA) te huaihawt hmangaihrawngbawl hna chu tanpui ngaite tanpui kawngah midangte mit tivar tu a ni ngei ang a ti.
Governor chuan Miretheite, Pachhiate, Riangvaite leh tanpuingaite tanpui chu kan zavai hna a ni tih a sawi a. Thalai te tan phei chuan tanpui ngaite tanpui aia thil intihhmuh tura tha zawk a awm chuan loh thu a sawi a ni.
Sawrkarin Accessible India Campaign kaltlangin michanhai riangvaite leh pianphunga rualbanlo te hamthatna tur tam tak a duang chhuak dawn tih a sawi a. Governor chuan, "India Sawrkar chu Rualbanlohna hrang hrang avanga mivanduai te tan Sawrkar thil phal zawk nih theih tum in a in buatsaih mek a. Hei hian a tak ram a thlen hma chuan keimahni zingah dinhmun ziawm zawk ten heng kan khawtlanga mi khawngaihthlak tak tak te kan theih tawpa lo tanpui chhunzawm zel hi Khua leh Tui tha kan nih anga kan tihtur a ni", a ti.
BROWWA ten Samaritan Riangvai Run an tanpuinna - Pawnthuah, Thawmhnaw, Ei tur leh thildang an kenkhawm te bakah Governor in ama puala tanpuina sumfai a rawn ken te chu Home Mother Pi Lalhmingthangi leh Home Naupang ten Governor hnen atangin an dawng a. Brig Birender Singh, Chief Engineer Pushpak leh Pi Sarika Jamwal, Zonal President, BROWWA ten Governor thilpek hlan hi an puibawm a ni.
Charity Programme puala inkhawm buatsaihah hian Samaritan Riangvai Run a Naupang te pualin Pushpak Naupang ten programme hlimawm an buatsaih sak bakah eitur te an sem a. He hun hman zawhah hian Governor chuan Project Pushpak ten Samraritan Riangvai Run a khawsa mek te puala Medical Camp an buatsaih chu a tlawh nghal bawk a ni. Pushpak Medical Camp hi Project Pushpak hnuaia 24 BRTF, 71 RCC leh 74 RCC a Doctor te - an vaiin 4 leh Tualchhung Doctor 1 bakah an mahni puihtu Medical Staff thahnem takin an thutchilh a ni.
Samaritan Riangvai Run Board aiawh a thusawitu Pu K. Lalnghinglova chuan Governor leh BROWWA te inphalna avanga thinlung taka an lawm thu a sawi a. Pathian in an Home chu mi thahnemngaite tanpuina leh mi thilphal te kaltlangin a enkawl a ni a ti. Samaritan Riangvai Run chu KT Khawla'n Pathian kohna a hmuh atanga lo indin a nih tih a sawi a. Tun dinhmunah he Runah hian mi 52 an awm mek a. Samaritan Riangvai Run hian khaw thenkhata cheng, Pianphunga Rualbanlo mi 54 te hnenah thlatin tanpuina Cheng 200 theuh a pe mek bawk a ni.
Charity Programme-ah hian Project Pushpak te chuan an hnathawh mek leh mipui vantlang hmasawnna atana an oenchhuahna kawng hrang hrangte sawina hun an hmanga. Report an pek dan chuan Mizoram chhunga Kawngpui KM 3600 aia thui mah leh Leidawh Metre 2300 a sei an enkawl mek a. Kumin hi Mizoram chhunga Kum 51 an rawngbawlna a ni tawh a ni.
