Vawiin chawhma khan January Ni 14-18, 2019 chhung awh tur XIX Mizoram Police Sports Meet hawnna Rajiv Gandhi Stadium-ah neih a ni a. Home Minister Pu Lalchamliana chu Khuallian niin a hmanpui a. Mizoram Police Sports & Cultural Control Board buatsaih a ni a, Sports Meet thupui chu ‘Unity through Sports’ tih a ni.

Home Minister Pu Lalchamliana chuan thu sawiin Mizoram Police-te hi Mizoram chhung mai ni lo India ram puma hming lang tham khawpin sports lamah hian an lo awm tawh thin a, a bik takin football-ah hian an lo lar tawh thin hle a ni, a ti a. Mi tam takin sports hi eizawnna atan an hmang a, police department chu hemi kawngah hian thawhhlawk pawl an ni, a ti a. Ram changkanna leh sports hi a inkungkaih thuk hle a, ram hrang hrang inelna Olympics-ah te hian ram changkang chu a chung lamah an awm deuh ber a, sports lama hma kan sawn chuan changkanna kan pan zel tihna a ni, a ti a. Kum 1990 atang khan sawrkar department hrang hrang sports lama inelna inter-departmental annual meet vawi 25 a awm tawh a, Mizoram police-te chu vawi 14 overall champion an lo ni tawh thu a tarlang a. Intihsiakna atana inkaihhruaina zawm chunga theihtawp chhuaha chak ngei turin kalkhawmte chu a chah a. Sports meet chuan unit hrang hrang inkara inunauna tha lehzual a thlen ngei a beisei thu a sawi a ni. 

Mizoram DGP Pu Balaji Srivastava chuan kalkhawmte lawmna thu a sawi a. Krismas leh kumthar ralmuang tak kan neih theih chhan pakhat chu police-te thahnemngaihna a ni, a ti a. Sports chuan inpawlkhawmna tha lehzual a thlen ngei a beisei thu a sawi a. 

Kan hnathawhnaah hian taksa sawizawi that a pawimawh hle a, hna lama hmasawnna thleng tur chuan sports lamah hmasawnna a awm a ngai a ni, a ti. 

XIX Mizoram Police Sports Meet-ah hian contingent hrang hrang 12 an tel a, chungte chu 1^st Bn. MAP, 2^nd Bn. MAP, 3^rd Bn. MAP, 3^rd IR.Bn, 5^thIR.Bn, Northern Range (Kolasib DEF/ 1^st IR.Bn), Southern Range ( Saiha/Lawngtlai/Lunglei/Serchhip DEF/PTS), Central Range (Aizawl DEF/ Traffic), Western Range (Mamit DEF/ 4^th IR. Bn), North East Range ( Champhai DEF/2^nd IR.Bn), Red Group (M.P.R.O/Fire &ES/ACB/FSL), PHQ Group (Police Hedquarters/ CID (SB)/ CID Crime/ Security/ Secretariat) te an ni a. Inelna 18 neih tur niin chung zinga thenkhat chu football, taekwondo, judo, table tennis, carrom, chess, badminton, boxing, basketball, shooting te an ni.

Contingent hrang hrang telna sports hawn lawmna parade neih a ni a. Mizoram Police Anthem inphuahsiakna result puan niin Tv. Hmingduhawma, Reiek khua hla phuah ‘Kan ram tan’ tih chu thlan chhuah a ni. Home Minister Pu Lalchamliana’n certificate leh cheng 50,000 a hlan a. Mizoram Police Sports Meet hi kum 1987 atang khan neih tan a ni a. 1^st Bn. MAP te an chak zing ber a, vawi 9 an chak tawh a ni.