Vawiin khan I&PR Department Lunglei thawktute leh Lunglei District MJA te chuan I&PR Conference Hall-ah inhlantharna hun an hmang.

He hun Pi Hmingthanmawii, I&PR Department kaihhruaiah hian Pi C. Lalremruati, Lunglei DIPRO chuan kum kalta lamahte MJA te nen thawh hona tha tak an neih thin chu lawmawm a tih thu a sawi a, hun kal zel turah pawh a hma aia thaa tawh hona an neih zel theih a beisei thu a sawi.

Kum kaltaa I&PR Department hmalakna tlangpui sawiin, MJA memberte State chhung leh pawna Tour neihpui an ni theite chu lawmawm a ti a. Journalist te tan Project Site Visit uar zawka kalpui zel anih tur thu sawiin thla leh maiah India hmarchhak state hrang hrangah Press Tour buatsaih a nih tur thu a tarlang a. Journalist te chu kan ram inrelbawlna Democracy vawngnung zel turin an pawimawh takzet a ni tiin Mizoram Assemly Election inthlan hun chhunga Election Commission of India duhdan kawng hrang hrang media ten an ti puitling thei chu fakawm a tih thu leh, kumin Lok Sabha inthlanah pawh thawhhona tha tak nena inthlan hmachhawn leh theih a beisei thu a sawi a. Sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga hmalak pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a ni. 

He hunah hian Pu H. Lalthansanga, MJA President pawhin thu sawiin media mi te chu thudik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a. Lunglei District M JA ten tun hnai maiah member thar pathum an nei chu lawmawm a tih thu a sawi a. Tuirial Hydel Project leh Kaladan Multi Modal Project te a hmuna tlawh turin Lunglei District MJA leh I&PR te chu an inpuahchah mek thu a sawi bawk a. Ram leh hnam, District hmasawnna tura theihtawpa hmalak zel an tum thu a tarlang bawk.

 He hunah hian Lunglei District I&PR hnathawktute leh MJA member thahnem tak an kalkhawm a. Kalkhawmte hian sawrkar advertisement inkaihhruaina ‘Guidelines of The Print Media Advertisement of Government of Mizoram’ an zirho bawk a ni.