Ni thum awh tur Sustainable Mountain Development Summit vawi 6-na (SMDS VI) Mizoram University-a neih chu Governor Lt. Gen. Nirbhay Sharma PVSM UYSM AVSM VSM (Retd.) chuan nimin tlai khan a kharna inkhawmah Khuallian niin a hmanpui. 

Governor chuan SMDS VI thupui, ‘Climate Change and Sustainable Mountain Cities’ chu thil pawimawh tak leh khawvel pawhin a buaipui em em a ni, a ti a. Himalaya tlangdung Jammu & Kashmir atanga Mizoram thlengin min nghawng vek a, chuvang chuan Nepal leh Bhutan te pawh tel ve tura a duh thu a sawi a ni. Arctic leh Antarctica rama vurte chanchin tarlan a ni fo a, Himalaya tlangte erawh ngaihthah a ni thin a ti a. Khawvel mihring 30% chawmtu a nih angin, khawvel lum chho zelah  hma lak vat a nih loh chuan kum 2035-a a tuiral hman vek tur thu a sawi a ni.  

Lt. Gen. Nirbhay Sharma chuan sik leh sa inthlak bakah khuarel chhiatna laka kan inpeih reng a ngai a ti a. Disaster Plan mumal tak leh disaster audit te neih tul a tih thu a sawi a. Hmasawnna tlo nei tur chuan kan khawvel ti chhe lo tawka leilung hausakna kan hman thiam a ngai a ni, a ti. Heng hmalaknate hi sawrkar tih atan bik dah lo ila, mipuite inlungrual taka kan tel ve a ngai a ni, a ti bawk. Summit hun chhunga an thil sawiho te leh ngaihdan tha tak tak an thawh khawm te chu a taka chantir ngei turin a duh a. Summit huaihawttu Integrated Mountain Imitative (IMI) leh Mizoram Sustainable Development Foundation (MSDF) te hnenah a bikin lawmthu a sawi a ni.  

Khualzahawm Pu Jitendra Chaudhury, MP Lok Sabha, Tripura East pawhin sik leh sa inthlak chungchang hi khawvelin a buaipui tanna hi kum 25 kalta vel chauh a ni, a ti a. Mithiamte zir bik tur a ni lova, mitin min nghawng avangin kan zirchian a, kan tanrual a pawimawh a ni, a ti. 

IMI President Pu Alemtemshi Jamir, IAS (Retd.)  leh Pi Amita Prasad, IAS, Addl. Secretary, MoEFCC ten thu tawi sawina hun an hmang a. Uttarkhand atanga AVANI Team hnenah R.S. Tolia Award hlan a ni. Prof. Lalnuntluanga, Vice President, MSDF in lawmthu sawiin he inkhawm hi a khar a ni.