Nimin tlai khan Chief Minister Bangla-ah Mizoram Chief Minister Pu Lal Thanhawla chuan India hmarchhak biala National Cadet Corps (NCC) hotulu ber, Maj Gen Raju Chauhan, Addl DG, NCC, North East Region leh a nau te - Group Commander Brig SK Dey, Silchar NCC Group  leh Wg Cdr Goel, Commanding Officer, 1 Air NCC MIZORAM te kawm in NCC hmalakna a sawipui. 

Chief Minister Pu Lal Thanhawla nen an inkawmnaah NCC hotupa, General Chauhan chuan hmarchhak bialah Mizo thalai ten NCC an phurpui bera, an la hlawkpui ber thuaia a beisei thu leh Mizo thalai te chu duhsak an phu ni ti in a sawi a. Chak zawka hmalak chhunzawm zel an tumnaah Chief Minister in a thlawp that em avanga lawmawm a tih thu a sawi a ni. 

Chief Minister Pu Lal Thanhawla chuan NCC hmachhawp langsar zual Lunglei a NCC Batallion din, NCC Academy Tuirial a din leh NCC Air Wing Tuirial a din chungchangah eng chen nge hmalakna awm tawh tih NCC hotute chu a zawt a. General Chauhan chuan an theih tawka chakin hma an lak mek  thu leh kum in chhung ngeiah NCC hmachhawp pathum te chu tihpuitlin a beiseiawm thu sawiin Chief Minister chu hawnna a neihsak turin a sawm nghal a. General Chauhan chuan Mizoram District dangah leh ramri hrula thingtlang khawlian deuhah te NCC hmalak puiah Chief Minister chu ngen in NCC chu sipai tan tum te tan chauh a nih loh thu leh mi puitling zawka thalai te chherna hmanraw tha tak a nih thu a tarlang a ni. 

NCC Air Wing a hman atan hian thlawhna pali a awm tawh a; thlawhna khalh dan zirna Flight Simulator pawh a dahna hmun remchang zawn mek a ni. Chief Minister chuan Wg Cdr Goel chu NCC Air Wing hmuhma enfiaha a thilhmuh te hrilh hriat turin a chah a, harsatna a awm pawhin chinfel pui a inhuam thu a hrilh.