St. Paul's Hr. Sec. School leh St. Paul's atanga zirchhuakte intelkhawmna pawl,  Paulians Alumni Association buatsaihin vawiin khan he sikul atanga kum 2011 HSLC leh HSSLC a  Top Ten a tlingte chawimawina hun an hmang a. Mizoram Governor Lt. Gen. (Rtd.) MM Lakhera PVSM, AVSM, VSM chu khuallian a ni.

Khuallian chuan hlawhtlinna chang tharte a lawmpui thu sawiin sikul chu zirlaite tana kawng dik kawhhmuhtu a ni, a ti a. Chutihrualin chu kawng dika a taka kal tur chu zirlai mimal tinte an ni a, chuvangin mimal thawhrimna a pawimawh em em tih hrereng turin zirlaite a chah a. Zirlaibu thiam (by heart) ringawt hian thiamna tling a pe lo a, kan hmabaka thil lo thleng a zir zel a fing taka ngaihtuahna hman thiam a pawimawh ber a ni, a ti. Zirlaite chu an chungah eng harsatna pawh lo thleng se tlanchhiatsan mai lova tumruhna thinlung nena harsatna chinfel tum tlatna rilru pu zawk turin a chah a. Buaina tlanchhiatsan chu thil awlai tak a ni a, mahse buaina chingfel tura mawhphurhna la ngam chuan nasa takin ngaihtuahna a sen a tul thin. Chutiang mi puitling nih ngei tum turin zirlaite a fuih a ni. Governor chuan Mizorama kum 4 a awm chhungin kum tin sikul hrang hrang Board Exam Result uluk taka a lo en thin thu tarlangin St. Paul's chu a titha ber pawl an ni ziah a, zirlaite an vannei hle a ni, a ti a. Hlawhtlinna hian mimal mai bakah nu leh pate leh sikul hmingthatna a khumtira. Zirlai dang Top Ten a tling pha ta lo te pawh hnual mai lova, an thiante hlawhtlinna aia ropui zawk hi an taihmak a, an tumruh phawt chuan an la chang chho dawn chauh a ni, Governor chuan a ti bawk.

HSLC 2011 ah St Paul's Hr. Sec. School atang hian Top Ten ah mi 8 an awm a, HSSLC 2011, Science Subject ah mi 9 leh Commerce ah mi 7-te Top Ten-ah an inhlangkai a. Vocational Studies a Mizoram pum puia Distinction a pass awmchhun mi pahnihte pawh he School atanga pass chhuak an ni. Vawiin hian heng zirlai tithate chawimawina bakah he sikul atanga zirchhuak mi entawn tlak tak tak, Er. Liansanga, Engineer-in-chief PWD, Prof. Lianzela MZU, Pu Vanengmawia IAS (Rtd) leh Pu Vanlalzawma Ex MP (LS) te chawimawina hlan an ni a. Paulians Alumni Association President ni lai Pu Lallungmuana, Pachhunga University College Lecturer chuan thusawina hun a hmang bawk.

Paulian's Proficiency Award, kum tina St. Paul's atanga zirlai thiam bikte hnena hlan thin hi kum 2001 khan bul tan a ni a. Paulians Alumni Association-te hmalakna niin he pawl hian zirlai taima leh thiam bikte chawimawina hun an buatsaih thin bakah zirlaite hnenah Scholarship an hlan thin a. Mi harsa zawkte tanpuina kawngah pawh hma lo la tawh thinin kum 2001-a Gujarat a lirnghing tuarte  tanpuinan leh fahrah enkawlna hmun Motherless Children's Home, Kolasib hnenah sum cheng nuai khat ve ve an lo pe tawh a ni.