Vawiin khan National Disaster Management leh State Disaster Management & Rehabilitation Department buatsaihin Kolasib Tumpui Community Hall ah chhiatrupna chi hrang hrang inzirtirna Disaster Awareness campaign neih a ni a, Kolasib DC Pi Niharika Rai, IAS chuan a hmanpui a ni.
Thuchah sawiin Pi Rai chuan, chhiatrupna kan tih chi hrang hrang tehi mihring nunphung tibuai thei vek an nih avangin amaha thleng Natural Disaster leh kan fimkhur loh vanga thil thleng thin te kan hriatchian a, a theih ang chen chena kan inven a pawimawh hle a ni, a ti a. Chhiatna thenkhat Natural Disaster entir nan Lirnghing, Tui lian, Cyclone, Tlang kang, Leimin etc. ah te inveng thei lo mah ila chhiatna tamtakah chuan kan fimkhur leh uluk taka thil kan tih avangin kan inveng thei a ni, a ti a. Chumi atan chuan vawiina Kolasib District chhunga Tlawmngai pawl hrang hrang hruaitu lo pung khawm tehi in pawimawh a ni, a ti a. Mithiam leh Chhiatna chungchanga a bik taka training nei tawh ten an zirtirna te chhawr tangkai a, a taka hmang ngei turin kalkhawm te chu a chah a ni.
Pu Madhur Verma, SP, Kolasib pawhin he hun hi hmanpuiin NGO hrang hrang hruaitute chu an thil zirte a taka chhawr tangkai ngei tur leh chhiatna tamtak kan fimkhur avanga kan pumpelh theih thil te thliar thiama nunna hlu tak kan chan thin te pumpelh dan kawng zawng thiam turin a chah a ni.
Pi Lallianpuii, DIPRO in inkhawm hi a kaihruai a. Mithiam thlan chuanten zirtirna benghawlh taktak an pe a ni. Pu F. Lalhmunsiama, Associate Prof.-in Introduction on Disaster in Mizoram tih a sawi a. Pu K. Lalremsanga, Addl. SP chuan Crowd Control on Disaster chungchang a sawi a, Dr. Rawngbawlan First Aid on Disaster tih sawiin chhiatna alo thlena Damdawiin panpui theih nghal vat a nih loh huna hliam sawngbawl dan kawng hrang hrang a sawi bawk a ni.
He hunah hian mipui lam atanga zawhna engemawzat chhawpchhuah te chhan a ni bawk a ni. Chawhnu session ah mithiam pali Pu Zothanliana DIET, Pu Lalremtluanga, DCSO Office, Tv. Lallawmzuala leh Pu Ch. Sanghuapa ten Lirnghing chungchang te, Kangmei, Leimin leh Cyclone chungchang leh Chhanchhuah hna thawh kawnga NGO te tihtur tihte an zirtir leh a ni.
Disaster Awareness Campaign ah hian Kolasib District chhung khaw hrang hranga Village Council hruaitute leh Tlawmngai pawl dang YMA, MUP, MHIP, MJA, MZP leh MSU te an tel a ni.
