Governor P.S. Sreedharan Pillai chuan kar liamta chhung khan Delhi-ah Mizoram mamawh thlenin Central Sawrkar Minister pawimawh tak tak te a dawr a. January ni 17 khan Union Home Minister Pu Amit Shah nen inkawmna an nei a. Hemi hma ni chiah, January ni 16 khan Pu Hardeep Singh Puri, Union Minister for Civil Aviation, Housing & Urban Affairs,etc, a kawm , Ministry of Health & Family Welfare-ah leh Road Transport & Highways-ah Official te kaltlangin Mizoram mamawh inziahna Memorandum a thehlut bawk a ni.

Governor P.S. Sreedharan Pillai chuan Union Home Minister Pu Amit Shah chu Mizoramah All India Institute of Medical Science(AIIMS) din a nih theih nan hma la turin a ngen a. Lengpui Airport tihlen, Lawngtlai leh Dhaka, Bangladesh inkalpawhna kawng siam, Aizawl leh Silchar inkar kawngpui Four Lane( a ruala motor pa 4 a sir tawn tawna tlan theihna) a siam , Indo- Bangladesh Border fencing siam hna a rang lama thawh zawh, Mizoram a IIM leh IIT din te, KMMTTP huam chhung Zochachhuah khua a International Trade Centre din bakah India leh Myanmar ramri hrula venhimna kalpui chungchanga hmalak dan tur sawi puiin tih hlawhtlin a tulna te a sawipui a ni.

Governor hian January ni 16 khan Union Civil Aviation Minister Pu Hardeep S. Puri kawmin Lengpui Airport atanga Delhi Direct Flight a awm loh thu te, hei hian hun leh tha a khawral thute bakah emergency a harsatna a thlen thu te a sawipui a. Lengpui Airport atanga khawpui dang pan tura thlawhna thlawk chhuak a tlem avanga harsatna te pawh a sawi bawk a. Governor chuan Lengpui Airport chu International Airport-ah hlan kai leh cheithat a tul tawh thu pawh Union Civil Aviation Minister hnenah hian thlen a. Union Civil Aviation Minister Pu Hardeep S. Puri chuan Mizoram atanga Thlawhna a zinmite harsatna chu a hriatthiam thu lo sawiin a remchang hmasa berah Thlawhna neitu company te (Flight Operators) kohkhawmin a lo sawipui tur thu a sawi a ni.

Attachment

  • Loading attachment...