Vawiin chawhma khan naupang kum nga hnuai lam zenghri danna pek runpui chu Lungleiah tan a ni.

A hawnna inkhawm Lunglei North Main Centre Venglaiah Dr Thani Pachuau, CMO, Lunglei chuan kaihruaiin khuallian Lunglei Bawrhsap Pu V. Lalsangliana, IAS, chuan Lungleia DC anga a awm hnua a hna hmasa ber naupangte hriselna kawng atana a hmang chu hlu a tih thu a sawi a. Naupangte hriselna ngaih pawihmawh saka a hun taka hri danna lak tir a pawimawh takzet thu sawiin naupangte chu ram hmathlir an nih anga an nungchang leh an hriselna chu an kutah a innghat tih hre chunga taimak chhuah turin kalkhawmte a chah a ni. Ram hriselna hi naupangte atanga teh anih thin avangin state leh India ram pum huap in hri danna hmanga inven lawk hi sorkarin a ngai pawimawh a ni, a ti bawk.

Dr. Lalrinthangi DIO, Lunglei chuan IPPI hi India ram pumah kalpui a ni a, tun thla ni 19 khan India President hova hman a ni. Mizoram ah chuan vawiin atanga hun hman niin zenghri danna chung changa hma lak tawhna leh hma chhawp hrang hrang sawiin tun tumah hian Lunglei District chhunga Main Centre 15 hnuaia in 31321 a naupang kum nga hnuai lam mi 13478 te hnenah hri danna hi pek a ni dawn a, zenghri danna pekna hmun tur hi Lunglei Dist chhungah booth 218 siam niin ni 2 chhung heng booth te hi hawn an ni anga, a hnuah thawktuten pek hmaih zawngin an vakchhuak leh dawn a ni.

He hun kaihruaitu Lunglei CMO Dr. Thani Pachuau chuan booth hawn chhung ngeia nu leh pa ten naupangte hri danna pek tir hram tura a ngen thu a sawi bawk.