Vawiin ah khan Mizoram Governor Lt Gen Nirbhay Sharma(Retd) chuan India zalenna sualtute zinga la damchhun mi tlem te zinga mi, Pu Darthawma, kum 96 a upa, Chanmari, Lunglei veng a cheng chu tlawh a. Zahna chibai buk pah in thilpek a hlan.

Pu Darthawma hian Indopui 2-na ah khan British India hnuaiah Indian Army Medical Corps zawm in Japan Sipai te bei turin Malaysia thliarkar pakhat Penang ah a fehchhuak a. He mi hnua ah hian World War II ah tho hian British sipai do lettur leh India tana zalenna sual chhuak tur in Subhash Chandra Bose a din Azad Hind Fauj(INA) a zawm leh a ni. Singapore Jail bakah Kum 1 leh thla 2 chhung Lucknow leh Chittagong Jail ah te a tan leh hnu in January 15, 1945 ah khan chhuah a ni.

Pu Darthawma chawimawina programme hi Cultural Heritage Centre, Lunglei ah Lunglei Bawrhsap Abhijit Vijay Chaudhary leh SP Pu Zosangliana ten an kaihruai a. He hunah hian a khup a that loh avanga wheel chair hmanga chesawn tawh, Pu Darthawma erawh a tel ve thei ta lo a ni.

Governor chuan Pu Darthawma chawimawina hunah hian thuchah sawiin Mizoram ah Mizo hnam leh India tana pasal tha, tun a la damlai ngei a chibai thei chu ropui a tih thu leh a rilru a hneh takzet thu a sawi a. India ram in tun dinhmun a thlen theih nachhan te, a ropui nachhan te, a zalen na chhan te bakah dinhmun pawimawh a luah theih chhan chu Pu Darthawma leh a mah ang a zalenna sualtute thawhrah liau liau a nih thu a tarlang a. Zalenna hlutzia hriatchian tum tur leh zalenna sualtute zahna chang hre tur in thangthar te a chahthu sawiin thangthar te tan ram leh hnam inpumkhatna ngaih pawimawh chu zahawmna atana thil pawimawh tawp a ni a ti. Mizoram ah zalenna sualtute kan thlir dan chu chiang zawka ennawn ni se tha a tih thu sawiin zalenna sualtute chuan zah, ngaihsak leh chawimawi an phu tih a tarlang a. Tunhman a India ram ni lemlo tuna India ram chhung lo ni ta, hmun hrang hrang a British awpbehna duhlova do lettu zawng zawng te kha an hnam bil tan pasaltha an nih rualin India tan pawh pasaltha a ni nghal a, zalenna sualtute an ni a ti.