213/2023-2024

Aizawl The 25th April 2023: Vawiin chawhnu khan Raj Bhavan-ah Governor Dr Hari Babu Kambhampati huaihawtin LV Prasad Eye Institute, Hyderabad hotute chuan thawhho dan sawipuiin Health Department, Zoram Medical College (ZMC),National Health Mission (NHM), Synod Hospital leh Eye Care Hospital thuneitute an kawm.

Governor chuan India hmun hrang hrang a LV Prasad Eye Institute-te hmalakna chu fakawm a tih thu a sawi a. Mizoram mipui tana mit lam inenkawlna tha zawk pek inhuama, Health Departmen, Sawrkar leh Private Hospital te nena thawhona tha neih beisei a Aizawl an lo thleng chu thil lawmawm tak a ni a ti.

Tunlai Khawvel hmasawnna sang chho zelin a ken tel emaw tih turin mit lama harsatna tawk an tam zel tih a sawi a. A enkawlna lamah tan lak a ngai hle a ni, a ti.Mizoramah pawh mit lama harsatna tawk tam tak an awm thu sawiin,enkawlna tha Kan mamawh nia a hriat thu a sawi.

LV Prasad Eye Institute-te nen thawhona tha a awm chuan Mizoram mipui zingah mit lama harsatna nei te tan awlsam zawk leh senso tlem zawkin inenkawlna an neih theih a rin thu a sawi a.Governor chuan Mit lama harsatna tawk ten a hun takah enkawlna tha an lak loh avangin mitdelna a thlen fo nia a hriat thu sawiin mit lama enkawlna tha zawk rawn chhawp chhuak thei tura ngaih LV Prasad Eye Institute chu Mizoramah Mipuite pan theiha an thiam a leh hmanruate nen rawn in chhawp thei se tha a tih thu a sawi a ni.

Dr.G.N.Rao,Founder, LV Prasad Eye Institute chuan an hnathawh dan tlangpui a sawi hmasa a. Mizoram nen a thawhona awm theih dan tur kawng hrang hrang te sawifiahna hun a hmang chhunzawm a.Mizoram Sawrkar leh Hospital te pawh thawhhona tha tak an neih theih nan in hawng turin a sawm nghal a ni.

Pi Esther Lalruat Kimi,Principal Secretary, Health Department chuan Mizoram dinhmun tlangpui leh sawrkar hmalakna hrang hrang te sawi hmasa a. Hemi hnu hian Dr.John Zohmingthanga,Director, ZMC, Dr.Eric Zomawia(NHM),Dr.R.Lalrindiki (Synod Hospital) leh Dr.K.L.Remsanga (eye care hospital) te pawhin an hmalakna hrang hrangte an sawi bawk a ni.

Sawihona neih atangin,Ophthalmologist, Optometrist leh Nurse training pek kawngah te, khawl tha zawk neih theih dan kawngah te leh sikul naupang te hnena uar zawk an mit that dan ensak te chu thawhona awm theihna nia an hriatthu an tarlang a ni.

LV Prasad Eye Institute-te hian naktuk ah ZMC an tlawh ang a ,zir chianna an nei a nghal dawn a.LV Prasad Eye Institute leh Mizoram aiawh te hian remchang hmasa berah inkawmhona an nei leh dawn a ni.

LV Prasad Eye Institute, Hyderabad-te hi Non-Profit Organizations(NGO) niin kum 1987 khan din a ni a,tunah hian India ramah centre-275 an nei mek a, khawvela Eye Care Network lian ber a ni.