Nimin tlai ah khan Raj Bhavan ah Mizoram Governor  Lt Gen. Nirbhay Sharma (Retd) leh Air Vice Marshal OP Tiwari , Asst Chief of Air Staff (Personnel Airmen and Civilians), te chuan inkawmna neiin  Indian Air Force(IAF) hnuaia hna chi hrang hrang ah  Mizo thalai tam zawk an luh theih dan kawng  hrang hrang te an sawi dun a ni.

Air Vice Marshal OP Tiwari , Asst Chief of Air Staff (Personnel Airmen and Civilians) chuan Governor hnenah hian  Chief of Air Staff in Mizoram Governor sawmna a ngaih pawimawh avanga Rally rawn endik leh kaihruai a ni tih a hrilh a.  Rally pawh tha taka tan a ni tawh tih hrilh in Chief Secretary leh State official te tawiawmna tha tak Air Force chuan Recruitment Rally ah hian an dawng tih a tarlang a ni. Governor Lt Gen. Nirbhay Sharma (Retd) chuan IAF in Mizoram ah Rally an rawn buatsaih chu lawmawm a tih thu sawiin  Mizo thalai tam takin an hlawkpui ngei a beisei thu a sawi a. Mizo thalai ten eng hna pawh thawk thei turin thiamna leh theihna an nei a, huntha leh hna thawhtheihna hmun awl remchang buatsaih sak   erawh an mamawh a ni a ti a. Governor chuan Mizoram ah IAF in Mizo thalai te tan rally tam zawk rawn buatsaih zel se a duh thu  Air Vice Marshal OP Tiwari chu a lo hrilh a ni.

 

 IAF thuchhuah in a tarlan dan chuan The Central Airmen Selection Board (CASB), New Delhi leh No 11 Airmen Selection Centre, Guwahat tangkawp chuan Inrinni(February 20, 2016) ah khan Aizawl ah Aizawl, Mamit, Kolasib, Champai leh Serchhip Kolasib district a cheng thalai te tan Air Force Recruitment Rally a buatsaih a. Air Vice Marshal OP Tiwari pawh in he rally hi a tlawh a ni. February 23, 2016 khian Rally hi Lunglei, Saiha leh Lawngtlai District a thalai te tan Lunglei ah President of CASB, Air Cmde RS Mehdiratta hovin neih a ni leh dawn a ni.