Mizoram rawn tlawh mek High Commissioner for Bangladesh to India Pu Tariq A. Karim chuan vawiin chawhnu khan Mizoram Governor Lt.Gen.(Rtd) M.M.Lakhera chu a chenna Raj Bhavan-ah tlawhin, Mizoram leh Bangladesh thawhhona chungchang thil pawimawh hrang hrang an sawi.

 

 

Pu Tariq A. Karim chuan Bangladesh Prime Minister Pi Sheikh Hasina chuan India leh Bangladesh inkara boruak tha zawk leh insumdawn tawnna zau zawk neih chu a duthusam a nih thu Governor a hrilh a. Mizoram leh Bangladesh ramri a hmun ngeia a tlawh thu leh ramria cheng mipuite leh ramri vengtu sipai te inkara inunauna leh inhriatthiamna boruak a leng chu thlamuan thlakin hun lo kal zel turah pawh heng ram pahnih te thawhhona turah phur takin hmalak a awlsam a rin thu High Commissioner chuan a sawi bawk. Bangladesh leh Mizoram ten insumdan tawnna hlawhtling tak an nei chho zel a nih chuan a hlawkna leh hmasawnna chu a ram pahnih mipuiten an tel ve ve thei dawn a, hetiang hun tha hi a inhawn reng lo thin avangin tun hi hmalak hun tak a nih thu Governor a hrilh a ni. Bangladesh High Commissioner chuan Mizoram Larsap chu an rama rawn zin turin a sawm nghal a ni.

Mizoram Governor chuan Mizoram dehchhuah thil hrang hrang leh a leilung hausakna insumdawn tawnna atana tha tur tarlangin heng ram pahnih inkalpawhna tur atan pawimawh em em kawngpui bakah rel, lui leh thlawhna lam tihchangtlun a pawimawh a tih thu a sawi a. Hun lo kal zelah pawh Mizoram leh Bangladesh inkara boruak tha a awm zel a beisei thu a hrilh bawk.

Bangladesh High Commissioner Pu Tariq A. Karim hian India hmarchhak bial state hrang hrang a tlawh mek a. Naktuk hian Aizawlchhuahsanin Manipur a tlawh anga, chumi zawhah Nagaland, Arunachal Pradesh leh Tripura te a tlawh leh dawn a ni.