Vawiin chawhnu khan Mizoram Public Service Commission (MPSC) Chairman Pu PC Lawmkunga chuan Mizoram Governor Lt. Gen. Nirbhay Sharma PVSM, UYSM, AVSM, VSM (Retd.) chu a pisaah a hmu a. MPSC chungchang te sawiin, a hun tawp huna a kal zel dan turte an sawi.

Governor chuan harsatna leh buaina lian tham awm lova a hun a hmang zo tur chu a lawmpui thu a sawi a. Mipuiin MPSC-a rinna an nghah ngam zel nan amah anga tawnhriat ngah leh mi rintlak Chairman atan ruat leh nise a ti. Pu PC Lawmkunga chuan kohhran leh khawtlang tana theihtawp chhuah a tum thu a sawi a. MPSC tana hmasawn zelna tur awm nia a hriatte a hrilh bawk a ni.

Pu PC Lawmkunga hi October ni 1, 1955 khan Mualthuam, Lunglei District-ah a piang a. Zirna lamah B.A. (Political Science) thleng zirin, kum 1979 khan Indian Administrative Service (Manipur-Tripura cadre)-ah a tling a. Sorkar laipui leh Manipur sawrkarah nihna pawimawh tak tak a chelh bakah kum 2001-04 khan Mizoram University-ah Registrar a lo ni tawh a ni. August ni 1, 2013 atanga October ni 1, 2015, a retire thlengin Manipur Chief Secretary a ni. October ni 5, 2015 khan MPSC Chairman atan ruat a ni a, thla 23 chhung office a luah a ni.