Vawiin khan District Agriculture Office Kolasib leh Bairabi Circle hnuaia NLUP beneficiaries te  hnenah NLUP tanpuina 3rd leh 4th Phase sem a ni.

Semna inkhawm hi Parish Hall, Venglai Kolasib ah neih niin Pu PC Zoram Sangliana, Chairman MIFCO Kolasib bialtu MLA ni bawk chu khuallian niin he hun hi a hmanpui a ni. Semna inkhawmah hian Khuallian chuan thu sawiin NLUP tanpuina chu a dawngtute in tihtakzeta an hman tangkai a duh thu a sawi a, rinawmna, taihmakna leh Pathian rawn chunga mahni Trade thlan theuh te kalpui turin a chah a. Mi tam takin Sawrkar Flagship Policy kal lai chu sawisel thin mahse mi rinawm leh mi tumruh te chuan NLUP an hlawhtlinpui thu a sawi a, tun tuma dawngtute pawh hi taima taka thawk turin  leh hlawhtlinpui tum ngei turin a fuih a ni. Khuallian chuan tanpui ngai leh mi mi harsa zual an awm chhung chuan NLUP chu heng tanpui ngaite’n lei rem an rah ve theih nan Sawrkar in a sem zel dawn a ni a ti bawk.  Hemi bakah hian kuthnathawktute’n an thar chhuah te man man zawka an dehral theihnan Sawrkar in NEDP chu a duan thu tarlangin NEDP hnuaiah hian thil tharchhuah dahthat/vawnthat na tur Cold Storage, kudam (warehouse), thil phhur luh leh phhurchhuah alo awlsam zawk nan link road laih leh thil dang tamtak pawh a huam thu a tarlang bawk a. Heng Sawrkar hmalakna te hi a taka mipuiin an chhawr tangkai zel theihnan duhsakna a hlan nghal a ni.

He hunah hian Trade pali (4) WRC-1, WRC-2, Oil Palm leh Sugarcane thlangtu mi 202 te hnenah tanpuina cheng 6,495,000/- sem chhuah a ni.

Attachment

  • Loading attachment...