Vawiin chawhma khan Central Jail, Tanhril-ah Home Minister Pu R. Lalzirliana chuan Jail chhunga Pathian thu zirna atana siam zirlaibu ‘Nun kawng dik’ chu a tlangzarh a. He programme hi Set Free Ministries, India buatsaih a ni.

Home Minister chuan jail tang ten kawng dik zawk an zawh theihna atana Set free Ministries-in zirlaibu an buatsaih chu lawmawm a tih thu a sawi a. Mite tana malsawmna nih hi kan tum ber tur a ni tiin Set free ministries chu hemi kawngah hian an entawntlak hle a ni, a ti a. Minister chuan kalkhawmte hnenah jail hi inhremna ni lovin nun siam that nan kan hmang thei a ni , a ti a. ‘Nun kawng dik’ zirlaibu chu ngun taka zir turin leh hun lo kal zel turah pawh chhungte leh khawtlang tana mi tangkai ni turin kalkhawmte chu a fuih bawk a ni. 

‘Nun kawng dik’ zirlaibu hi jail tangte tan bika siam niin Set Free Ministries buatsaih a ni a. Zir duhte tan chauh zir tura zirlaibu hi siam a ni a. Zirlaibu hi bung sarih (7) ah then a ni a. Zir hun chhung hi thla thum niin thla thum ral hnu hian exam huaihawt a ni dawn a. Hemi exam-te tan hian Graduation Day leh Certificate hlanna hun neih tura ruahman a ni. 

Set Free Ministries Director Rev K. Lalzuala chuan programme hi a kaihruai a. Zirlaibu thlirlawkna leh kalhmang Commissioner Lalkiamlova atangin ngaihthlak a ni a. Inspector General of Prison, Pu Sangthuama atangin thusawina ngaihthlak a ni bawk a. Home Minister chuan programme zawhah hian central jail chhunga hmun hrang hrang a fang nghal a ni.