Nimin tlai khan Chief Minister's Cabinet Room-ah New Economic Development Policy (NEDP) Core Committee chu Chairman, Chief Minister Pu Lal Thanhawla hova thukhawmin NEDP kaihhnawih thil pawimawh an ngaihtuah ho.

NEDP puipate thutkhawm pawimawh takah hian Report pahnih - Report of NEDP Monitoring & Surveilance Committee leh Report of MEDMOC on Entrepreneurship Promotion ngaihthlak hmasak a ni a. Hemi hnuah hian NEPD hnuaia hmalakna kal mek chungchang, hmachhawpte leh rawtnate sawiho leh hmalak chhunzawm dan turte rel a ni.

NEDP Core Committee-ah hian NEPD hmalaknate mipui nen sawiho leh mipui hnena darh zau zawka puanzar dan tur te, NEDP hnuaia hmalakna - Public Finance Management,  Land Reforms, Administrative Reforms, Skills Development, Power Sector Reforms leh Falkawn Referral Hospital tihchangtlun chungchangte, NABARD Loan Project-te leh NEDP suihzawma chung project te chu a pawimawh dan indawta rem tumna chungchang te sawiho a ni a. NEDP Schemes/projects hnuaia Agriculture leh Horticulture link road-te, CM's Rural Housing Scheme leh Entrepreneurship hnuaia hmalakna  te, a mamawh leh hmang tangkai thei tuten an lo hriatchian zawk nan mipui nawlpui leh beneficiary-te hriat tura hawn/tlangzarh chungchang te; Horticulture, Agriculture, Fishery, AH&Vety, Sericulture, etc hnuaia thlai/ran/ buh leh bal thar chhuahte awmze neia hralh a nih theihna tura Market Linkage kalpui dan tur chungchang, Sawrkar Department  hrang hrang Office Building- te, an ramluah leh bungraw chungchanga thuneihna kengkawhtu tur siam bakah  NEDP hmalakna a kohhran leh tlawmngai pawl hrang hrangte thawhpui dan tur te ngaihtuah ho a ni.

Nimina NEDP Core Committee, Chief Minister hova neihah hian Home Minister Pu R. Lalzirliana, NEDP Core Committee Alternate Chairman leh member dangte - Planning Minister Pu Lalsawta, Commerce & Industries Minister Pu H. Rohluna, UD&PA Minister Pu Zodintluanga, Horticulture Minister Pu PC Lalthanliana, Health Minister Pu Lal Thanzara, State Planning Board Vice Chairman Pu H.Liansailova, Finance Secretary Pu Lalmalsawma leh Planning Secretary Dr.C.Vanramsanga, Member Secretary, NEDP Core Committee te an tel a ni.