Khawvel hmun dang rualin vawiin khan Mizoramah pawh World Tourism Day hman a ni a, he hunah hian Chief Minister Pu Lal Thanhawla chuan Berawtlang Tourist Complex-a Rs. 467.71 lakh seng a sak Convention Centre chu a hawng. He hun hi Finance Minister Pu Lalsawta chuan telpuiin, Tourism Minister Pu John Rotluangliana chuan World Tourism Day lawmna inkhawm Convention Centre Conference Hall-a buatsaih chu a kaihruai a. He hunah hian Central YMA leh Tourism Department chuan nasa zawka Mizorama tourism tihhmasawn a nih theih nan thawhhona thuthlung an ziak bawk a ni.

Chief Minister chuan kumin Convention Centre thar changtlung tak Mizoramin a nei chu lawmawm a tih thu leh tangkai taka hman a nih a beisei thu a sawi a. Vawiin World Tourism Day thupui atan United Nations World Tourism Organization-in “Sustainable Tourism: A Tool for Development” tih a thlang chu tourism tihhmasawn lama Mizoram hmachhawp leh mamawhna nen pawh a inhmeh hle nia a hriat thu a sawi bawk. Tunlaiah khawvelin hmasawnna (development) a sawi reng rengin ngelnghet leh tlo (sustainable) hi a lam tel zel tawh a ni, a ti. Chief Minister chuan tourism industry chu eizawnna tha tak a nih thu sawiin, Mizoram pawh India hmarchhak state dangte ang bawkin khualzin mite hip theitu tur ram ngaw nalh leh sik leh sa nuam tak kan nei a ni, a ti a. Sorkar pawhin inkalpawhna tha zawk siam kawnga rel leh thlawhthaihna tum hmun te ngaihtuahin, kawlpetha siamchhuahna te a siam belh zel thu leh ILP awlsam zawka neih a nih theih nan online-a dil theih turin hmalak mek a nih thu te a tarlang.

Chief Minister chuan Mizoram chu khualzin miten eco-tourism industry tha tak siam theihna a ni tih an sawi thin a; Amaherawhchu hmasawnna chhuanlama ram mawina tichhe zawnga thil thar siam emaw sak emaw lakah fimkhur a tul a ni, a ti. Khualzin hip tumna lam development hna thawh hian "sap" takin emaw ram dang changkang zawka an tih dan te anga hmalak nilovin Mizo taka hnam zia phochhuak thei zawng kalpui tur a ni, a ti. Chief Minister chuan mikhual kan dawnsawn thin danah pawh Mizo ten rilru zau tak pu in, kan ngaihdan leh rilru te pawh kan thlak a ngaih thu a sawi a. CYMA nen a thawhhona thuthlung ziah pawh chuan tourism-ah hmasawnna tha tak a thlen ngei a beisei thu a sawi bawk.

Vawiin hun kaihruaitu Tourism Minister chuan hall tha tak siam a hawn a nih theih nana thawktute thahnemngaihna chungah lawmthu a sawi a. Swachh Bharat hmalakna hnuaiah Tourism Department chuan Aizawl leh a chhehvel a tourist facility fai ber thlanna a neih naah Berawtlang Tourist Complex chu thlangin, vawiin programme-ah hian Finance Minister Pu Lalsawta chuan an manager hnenah lawmman pawisafai Rs.10,000 leh certificate a hlan a ni. Tourism Department leh Central YMA ten “Tourism Awareness Campaign” neih chungchanga thawhhona thuthlung ziah hi Tourism Department aiawhin Tourism Secretary leh Director ten hming an ziak a, CYMA aiawhin CYMA President leh General Secretary ten an sign a ni.

Berawtlang Convention Centre sakna sum hi sorkar laipuia Ministry of Tourism bultum niin, chhawng hnih a sak a ni a. Ground floor chu metre 823 bial a zau niin, mi 230 leng Conference Hall, Green Room, Rest Room, Exhibition Hall, VIP Lounge, Entrance Lobby leh Reception area a awm a; Basement Floor chu metre 383 bial a zau niin, he floor-ah hian mi 44 lenna Banquet Hall, Press Conference Hall, Store Room leh Toilet Block a awm a ni. Convention Centre sak hna hi PWD in thawkin, 1.6.2011 khan sak tan a ni a, ni 9.1.2015 khan zawh a ni a, ni 17.2.2017 khan Tourism Department kutah hlan a ni.

Vawiin programme-ah hian Tourism Director Pu Biakthanmawia Pautu chuan World Tourism Day theme “Sustainable Tourism: A Tool for Development” tih thupui hmangin thusawina hun a hmang a, Pu Henry Lalmuankima C.E (Buildings) PWD chuan technical report pe in, Tourism Secretary Pu V. Lalremthanga chuan lawmthu sawiin hun hi a khar a ni.