No.3288/2021-2022

Aizawl, the 6th December 2021 : Vawiin khan Larsap Dr. Hari Babu Kambhampati chuan Oil Marketing Company – Indian Oil Corporation Limited (IOCL), Bharat Petroleum Corporation Limited (BPCL) leh Hindustan Petroleum Corporation Limited (HPCL) hotulute leh aiawhte a pisa Raj Bhawan ah a kawm a,  Mizorama tuialhthei leh eirawngbawlna gas dinhmun te an sawiho a. Meeting ah hian Food Civil Supplies & Consumer Affairs Secretary Pu Zothanmawia leh F, CS &CA Director Pi Ramdinliani te pawh an tel a ni.

Larsap chuan Mizorama tuialhthei leh eirawngbawlna gas dinhmun te, Company ten mipui mamawh an phuhru em tih te leh mipui mamawh pekna kawnga harsatna an tawk em tih te, Ujjawala scheme thlen chin leh a kalpuina kawnga harsatna a awm te, harsatna awmte chu engtia sutkian thei nge a nih tih te hriatchian a duh avanga meeting hi koh ani tih sawi a. Oil Company te chu Aizawl leh District Headquarters ah te eirawngbawlna gas tunah Point Delivery a sem mek chu Home Delivery angin hmun tam zawka sem ani thei nan hma la turin a hrilh a. District hotute nen thawk hoin mirethei te tana gas connection pekna scheme – Pradhan Mantri Ujjwala Yojana (PMUJ) dawng thei te chu chhinchhiah a, hengten gas connection an neih vat thei nan chak zawka hma la turin a hrilh bawk a ni. Siaha a Petrol Pump pakhat chauh awmin mipui mamawh a phuhru tawk lo tia Larsap in a sawi chu IOCL lam chuan pump dang pakhat hawng belh thuai ani dawn tiin an chang a ni.

Meeting ah hian IOCL chuan Mizorama tuialhthei leh eirawngbawlna gas chungchanga thil hrang hrang – tuialhthei an phurluh dan leh petrol pump dinhmun te, tuialhthei pawlhdalh venna atana tunlaia khawl hmanga an vil dante; Mizorama eirawngbawlna gas phurh luh, sem dan chungchang te leh hemi kawnga harsatna awm te; Mualkhang Gas Bottling Plant tihlen chungchanga an hmalakna tawhna te leh mirethei te tana gas connection pekna scheme – Pradhan Mantri Ujjwala Yojana (PMUJ) an kalpui dan leh a dinhmun te an tarlang a. HPCL aiawh pawhin Mizorama an Company in hma an lak dante an tarlang bawk a ni.

Food Civil Supplies & Consumer Affairs hotulu te pawhin eirawngbawlna gas sem dana Local Council leh Village Council te nena an thawh dan chungchang leh eirawngbawlna gas tihchingpen venna kawnga hma an lak dan te an sawilang a ni. Gas semna hmunah gas bukna dah ngei ngei turin an Distributor te hriattir nise tia Supply hotuten an sawilan chu Mizoram eirawngbawlna gas semtu IOCL chuan an hnuaia Distributor zawng zawngte chu Point Delivery an tihna hmunah cylinder buk tling ngei consumer ten an dawn thei nan a hmunah a bukna dah ngei tura an hriattir tur thu an sawi a ni.

IOCL in Mizoram pumah petrol pump 52 leh LPG Distributor 60 an neih mek thu te, kum 3 chhungin pump 30 dah belh an tum thu te, kum 3 chhunga Mualkhang Gas Bottling Plant tihchangtlun a ni tur thu te, hemi atan cheng vaibelchhe 180 bawr an sen tur thu te, tihchangtlun anih hnua Mizoram mamawh chu kum 30 lo awm tur thleng an phuhru beisei thu te leh rel a chawm tuialhthei dah khawlna hmun tur Rail Fed Depot sak ani thei ram an zawn mek thu te meeting ah an tarlang a. HPCL in Mizorama pumah petrol pump 7 an nei mek thu leh 2024 thleng pump dang 32 hawn an tum thu te an tarlang tel ve bawk a ni.