No.7361/2020-2021

Vawiin chawhnu khan Governor P.S. Sreedharan Pillai chuan India rama vantlangmi te chawimawina sangber zinga pakhat, Padma Shree Award dawng tur Pi B. Sangkhumi, Former Chairperson, MPSC leh MHIP President hlui chu Raj Bhavan-ah leng turin a sawm a. He hunah hian Governor chuan Pi B. Sangkhumi hnenah hian lawmpuina thuziak a hlan a ni. January 25 khan  Padma Award dawngtur mi 119 hming President of India in a pawm fel tawh te hming puan a ni a. Heng mi chhuanawm tak tak te zingah hian khawtlang rawngbawlna, abikin hmeichhia te chawikanna leh hmeichhe rahbi tleu te dinhmun siam that kawnga a thawh hlawk a vangin Pi B. Sangkhumi pawh a tel a ni. 

Governor P.S Sreedharan Pillai chuan mahni chhungkaw enkawlna piah lama midangte thatna tura vantlang tana theihtawp chhuah thin, mi tlawmngai fal te baka chawimawi phu an awm lo tih a sawi a. Vantlang tana rawngbawl hna hi Pathian tana rawngbawlna  a ni a ti a. Pi B. Sangkhumi leh a thiante hnathawh leh Mizo Hmeichhiate dinhmun chawikanna kawnga an thawhrimna te a then a zar chiah a hre nachungin an ngaihsan awm a tih thu a sawi a. Hetianga hnathawk tha India Sawrkarin a chawimawina sang a hlan tlak, Mizo hmeichhia zingah kan nei leh hi inchhuanna tham a ni a ti. Pi B. Sangkhumi chu duhsakna hlanin Mizo hmeichhe zawng zawng tan entawn tlak leh chona petu a nih ngei a beisei thu a sawi bawk a ni. 

Pi Sangkhumi pawhin Governor hnenah hian vantlang rawngbawlna avang leh a hnathawh hrim hrimah  India Sawrkar chawimawina  dawn a beisei ngai loh thu leh hetiang dinhmun a lo thleng ta chu Pathian leh a thawhpui te vang a nih thu a sawi a. Mizo khawtlang nuna Hmeichhia te dinhmun chhe thin lutuk siam that nan an phak ang tawk tawkah  theih tawp an chhuah thin thu te, a chang phei chuan hmeichhe chunga hleilenna thleng an dona kawngah te mi nuihsawh leh deu te pawh an tawh fo thu te a sawi a. Beidawngloa an beih chhunzawmna te Pathianin mal a sawm a tunah chuan rochun tur chungchangah te, inneih chungchangah leh kawng dang dangah te duhthusam la ni lo mahse  Mizo Hmeichhia te dinhmun a lo zia chho zela, a lawmawm takzet a ni a ti. 

Pi B. Sangkhumi hi Sawrkar hnathawk pension tawh a ni a. Director, Higher & Technical Education a thawh lain MPSC member atan lakluh a ni a. MPSC-ah hian kum 9 thawkin Chairperson nihna te pawh a chelh tawh a ni. Vantlang rawngbawlna lamah MHIP hruaitu hlun thin a ni a President leh nihna dangte hun rei tak a chelh tawh thin a. Hmeichhe chawikanna kawngah theihtawp chhuah thin niin Hmeichhe rahbi tleu tawh leh ruihhlo avanga buai te tanpuina kawngah a thawk nasa thin hle a. Jeriko Khualbuk leh Nun siamthatna hmun (Home) thenkhat  dinna kawnga sultu zinga mi a ni bawk a ni.