No.7362/2020-2021

Vawiin khan Agriculture Minister, Cooperation Department changtu ni bawk Pu C Lalrinsanga hovin NABARD hnuaia Fund pahnih kaltlanga loneih leh bawnghnute sawngbawlna kawnga hengte tihchangtlunna atana ruahmanna siam theih  - Agriculture Infrastructure Fund (AIF) leh Dairy Processing & Infrastructure Development Fund (DIDF) chungchang hmelhriattirna leh inhrilhhriatna sensitisation meeting RCS Meeting Hall Babutlang ah neih a ni.

Pu C. Lalrinsanga chuan Sawrkar Laipuiin loneih lamah hmasawnna a awm theih nan kalphung thar a duang chho mek a tiin chung zingah AIF chu thil thar, lonei mi ten an tangkaipui ngei theihna tur ruahmanna nia a hriat thu a sawi a. AIF in loneih bakah ran vulh te pawh khaikhawma kalkawp tir convergence mode a kalpui chu a tum lian tak a niin ka hria, a ti. NABARD tanpuina in loneih leh ran vulh lamah hmasawnna tur tam tak a awm a, mahse heng ruahmanna hi duh angin kan la hmelhriat lova, a bik takin tharchhuah sawngbawl leh a kaihhnawih atana loan NABARD in an buaipui AIF te hi thil thar anih avangin hmelhriat leh hriatchian a ngai a ni, a ti a. Chumi avanga NABARD hotuten te chu AIF leh DIDF sawizau tura sawm an nih thu a sawi. 

Minister chuan Cooperative Department chu Department lang sar lo ni mahse an hnathawh  leh project kalpui te hian economy a nghawng thei a, heng project te hian Department tam tak an khaikhawm a, chungte hlawtlinna chuan nasa takin economy a nghawng tha neiin hmasawnna a thlen thei a ni, a ti. Ram changkang tam taka cooperative movement chu an hmasawnna rahbi pawimawh tak nia a hriat thu sawiin Mizorama nasa leh zawka cooperative movement pawimawhna kan hriata kan kalpui hi thil tul tak a ni, a ti bawk. 

Meeting hi Dr. Lalzirmawia Chhangte, Special Secretary, Cooperation Department in a kaihruai a. AIF chungchang presentation hi Pu T Sudhir, DGM, Mizoram NABARD Regional Office chuan neiin AIF tum te, a dil thei tute, a hmanna tur te, a loan kalphung te, a rulh dan te a sawi a. Pi H. Lalhmachhuani, AGM, Mizoram NABARD Regional Office chuan DIDF kalphung tlangpui a tarlang a ni. Heng Fund 2 sawi zau belhna leh Mizorama NABARD hmalakna thenkhat chu Pu SM Malick, GM  Mizoram NABARD Regional Office in a sawi bawk a ni. 

Meeting ah Pu Lalrinsanga, Registrar of Cooperative Societies leh Cooperation Department official-te, Agriculture Department official-te bakah PIGFED leh MAHFED aiawhte an tel a ni. 

Agriculture Infrastructure Fund (AIF) atan Sawrkar Laipuiin ram pum tan vaichhechhe nuai khat a ruahman a. 2021 atanga 2030 thlengin he ruahmanna hi kalpui tur a ni a. Heng loan te hi 2024 thlenga pek zawh tur niin Mizoram tana pek theih zat chu vaibelchhe 196 niin NABARD  hotuten an sawi.